Search

په پېښور کې د هوايي ډزو په تور د اتو زومانو په ګډون لسګونه کسان نیول شوي

News image
8 ساعته مخکې خالد حمیدزوی

کابل‌ټریبیون (کې‌ټي) — د خیبر پښتونخوا په پېښور ښار کې پولیسو د واده په مراسمو کې د هوايي ډزو د مخنیوي لپاره د عملیاتو پر مهال د اتو زومانو په ګډون لسګونه کسان نیولي دي.

د ټرایبل نیوز خبري شبکې رابور له مخې، د پولیسو په وینا، د بودھ بیر، ارمړ، تهکال، چمکني، فقیراباد، ریګي، اغا میر جاني شاه او داودزۍ پولیسو مرکزونو اړوندو ډلو په بېلابېلو سیمو کې عملیات کړي او هغه کسان یې نیولي چې د واده په مراسمو کې یې هوايي ډزې کړې وې.

پولیس وايي، له نیول شویو کسانو څخه وسلې هم ترلاسه شوې او د پېښو په تړاو یې پر هغوی قضیې ثبت کړې دي.

د راپور له مخې، په نیول شویو کسانو کې اته زومان هم شامل دي چې د خپل واده شپه یې د پولیسو په بندخونو کې تېره کړې ده.

په همدې حال کې د نیول شویو کسانو خپلوان د هغوی د خوشې کېدو لپاره د پولیسو د مرکزونو مخې ته راټول شوي دي.