کابلټریبیون (کېټي)— د روسیې د بهرنیو چارو وزارت ویاندې ماریا زاخارووا ویلي، په افغانستان کې د ترهګرۍ د ریښو له منځه وړل او د دغه هېواد د وضعیت ټیکاو د سیمې د امنیت لپاره اړین دي. نوموړې په ځانګړي ډول د داعش خراسان څانګې ته په اشارې ویلي، چې نړیوالې ترهګرې ډلې په مستقیم ډول د افغانستان په خاوره کې فعالیت کوي.
زاخارووا د جمعې په ورځ، د لړم ۲۹مه، په مسکو کې یوې خبري غونډې ته
ویلي، د نړیوالې ترهګرۍ پر وړاندې مبارزه باید له هر ډول «پټو موخو» او «پټو
اجنډاوو» پرته ترسره شي.
هغې زیاته کړې، چې مسکو د سیمهییزو ستونزو د حل لپاره د سیمهییزو
لارو چارو اصل مهم ګڼي او چمتو دی چې د ترهګرۍ ضد مشخصو اقداماتو په اړه خبرې وکړي
او د هوکړو پر بنسټ د دغو اقداماتو په پلي کولو کې مرسته وکړي.
د روسیې د بهرنیو چارو وزارت ویاندې پاکستان د سوېلي اسیا، په ځانګړي
ډول د افغانستان په تړاو، د ترهګرۍ پر وړاندې مبارزه کې د مسکو مهم شریک بللی دی.
هغې ویلي، له اسلاماباد سره خبرې او نږدې همغږي هم په دوهاړخیزه کچه او هم د څو
اړخیزو همکاریو په چوکاټ کې روانې دي.
زاخارووا ویلي، روسیه د «مسکو فارمټ» ته لومړیتوب ورکوي، ځکه د هغې په
باور، دا د سیمې تر ټولو ټولګډونه میکانېزم دی. په دغه فارمټ کې روسیه،
افغانستان، پاکستان، هند، ایران، چین او د منځنۍ اسیا پنځه هېوادونه، قزاقستان،
قرغیزستان، تاجکستان، ترکمنستان او ازبکستان ګډون لري.
هغې د طالبانو او پاکستان ترمنځ روان کړکېچ ته په اشارې ویلي، مسکو
وضعیت له نږدې څاري او په دوامداره توګه یې د سیاسي او ډیپلوماټیکو لارو د ستونزو
د حل غوښتنه کړې ده.
د زاخارووا په وینا، روسیه چمتو ده چې د دواړو لورو په غوښتنه د
طالبانو او پاکستان ترمنځ د خبرو اترو په برابرولو کې همکاري وکړي.
طالبانو بیا په وار وار ویلي، چې داعش په افغانستان کې د فعالیت لپاره
ځای نه لري او د دې ډلې پر وړاندې یې مبارزه کړې ده.