Search

د سردار داود خان روغتون د زړه او رګونو ناروغیو د درملنې مرکز ۸۰ سلنه بشپړ شوی

News image
18 ساعته مخکې خالد حمیدزوی

کابل‌ټریبیون (کې‌ټي)— د طالبانو د ستر درستیز د روغتیايي چارو قوماندانۍ وايي، د کابل د شهید سردار محمد داود خان ۴۰۰ بستریز کمپلکس روغتون کې د زړه او رګونو ناروغیو د درملنې، طبي زده‌کړو او څېړنو د مرکز د جوړېدو چارې ۸۰ سلنه بشپړې شوې دي.

د دغې قوماندانۍ د معلوماتو له مخې، دغه مرکز به په درېیو پوړونو کې جوړ شي او د زړه او رګونو ناروغیو اړوند بېلابېلې تخصصي څانګې به په یوه ځای کې ولري.

د ورکړل شویو معلوماتو له مخې، د مرکز ودانۍ شاوخوا ۹۵۰ متره مربع مساحت لري. په یوه پوړ کې یې د ۱۸ بسترو او څلورو ځانګړو (VIP) خونو جوړول په پام کې نیول شوي او د زړه د جراحي عملیاتو لپاره به دوه عملیاتي خونې هم ولري.

د دغه مرکز په جوړښت کې د معلوماتو او ثبت برخه، د زړه د داخلي ناروغیو د درملنې څانګه او نورې تخصصي برخې شاملې دي.

د مرکز د جوړېدو موخه د زړه او رګونو ناروغانو ته د تخصصي روغتیايي خدمتونو برابرول، د ډاکټرانو مسلکي روزنه او په دې برخه کې د څېړنیزو فعالیتونو لپاره د زمینې برابرول بلل شوې ده.

د طالبانو د ستر درستیز د روغتیايي چارو قوماندانۍ ویلي، دغه مرکز به په عصري طبي وسایلو او تجهیزاتو سمبال شي او د زړه او رګونو ناروغیو د تشخیص او درملنې په برخه کې به خدمات وړاندې کړي.

تر دې وړاندې هم د دغه مرکز د جوړېدو په اړه راپورونه خپاره شوي وو او د پروژې لګښت شاوخوا ۲۰۰ میلیونه افغانۍ ښودل شوی و.