د اغاخان پراختیايي شبکې مسوولینو د طالبانو د بهرنیو چارو له وزیر امیرخان متقي سره په لیدنه کې په افغانستان کې د روغتیايي خدمتونو د پراختیا او د میندو او ماشومانو لپاره د فرانسې طبي انستیتیوت د ظرفیت لوړولو ژمنه کړې ده.
د طالبانو د بهرنیو چارو وزارت د پنجشنبې په ورځ ویلي، چې د دغه وزارت
وزیر امیرخان متقي د اغاخان پراختیايي شبکې د رهبرۍ له یوه لوړپوړي پلاوي، د
پوهنتونونو او روغتونونو له رییس ډاکټر سلیمان شهابالدین او ورسره مل پلاوي سره
لیدلي دي.
د وزارت په وینا، متقي په دې لیدنه کې د روغتیايي فعالیتونو پر دوام
سربېره، د تاریخي ځایونو د بیارغونې او د بزګرانو د ملاتړ په برخو کې د اغاخان
پراختیايي شبکې د همکارۍ غوښتنه کړې ده.
د طالبانو د بهرنیو چارو وزارت ویلي، د اغاخان پراختیايي شبکې
مسوولینو په افغانستان کې د روغتیايي خدمتونو د زیاتوالي او د میندو او ماشومانو
لپاره د فرانسې طبي انستیتیوت د ظرفیت لوړولو او پراختیا ژمنه کړې ده.