کابلټریبیون (کېټي) — د سعودي عربستان د «ډیلټا انرژي» شرکت له پاکستان دولتي شرکت «انټر سټېټ ګاز سیسټم» سره هوکړه لاسلیک کړې، چې له مخې به یې په پاکستان کې د انرژۍ د زېربناوو د پراختیا امکانات وڅېړل شي. د دواړو شرکتونو په ګډه اعلامیه کې ویل شوي، چې په دې پروګرام کې د شاوخوا ۳۰ میلیارد ډالرو پانګونې وړاندیز شوی دی.
د اعلامیې له مخې، په دې پروګرام کې د طبیعي ګاز د یوې نللیکې د
جوړولو امکان هم ارزول کېږي، چې د پاکستان له لوېدیځې پولې دغه هېواد ته ننوځي او
د عرب سمندرګي پر غاړه د ګوادر بندر ته وغځېږي.
په اعلامیه کې ویل شوي، چې د دې نللیکې د احتمالي غځولو موضوع به د
پاکستان تر ختیځې پولې پورې هم وڅېړل شي. همداراز، د مایع طبیعي ګاز (LNG) د تاسیساتو، د ګازو د پروسس او زېرمه کولو مرکزونو او د صادراتو د
ترمینلونو جوړول هم د دې پروګرام برخه ده.
د دې پروګرام بله برخه د یوې داسې نللیکې د جوړولو ارزونه ده، چې د
افغانستان او پاکستان پر فرضي کرښه د چمن له سیمې پیلېږي، د پاکستان له خاورې
تېرېږي او د فاضلکا ښار ته نږدې د هند تر پولې رسېږي.
ډیلټا انرژي دغه مسیر «بنسټیزه ستراتیژیکه ژمنتیا» بللې او ویلي یې
دي، چې د دې پروژې د عملي کېدو لپاره به د پاکستان او هند له چارواکو سره رسمي
خبرې او هوکړې اړینې وي.
پاکستان ته د ګازو د لېږد لپاره د نویو نللیکو د جوړولو طرحې له
کلونو راهیسې له ځنډ سره مخ دي.
ډیلټا انرژي د افغانستان د کشک (Kashk)
ګازي ساحې امتیاز او د دغه هېواد نورې طبیعي سرچینې د ګازو د احتمالي
سرچینو په توګه یادې کړې دي. دغه شرکت ویلي، چې دا پروګرام د ترکمنستان ـ
افغانستان ـ پاکستان ـ هند (TAPI) له پروژې
جلا دی او له ترکمنستان سره تړاو نه لري.
د دواړو شرکتونو ترمنځ لاسلیک شوې هوکړه یوازې د یادو پروژو د ارزونې
لپاره یو چوکاټ برابروي. دا هوکړه د وروستۍ پانګونې پرېکړه، د پروژو د تمویل ژمنه
یا د جوړولو قطعي تعهد نه ګڼل کېږي.