Search

د امریکا فډرالي محکمې پاکستان ته د یو شمېر افغان کډوالو د لېږدولو پلان وځنډاوه

News image
13 لړم 1405 - 08:56 خالد حمیدزوی

کابل‌ټریبیون (کې‌ټي)— د امریکا یوې فډرالي محکمې د ټرمپ د حکومت هغه پلان په لنډمهالي ډول ځنډولی چې له مخې یې ټاکل شوې وه یو شمېر افغان کډوال د پاکستان له لارې افغانستان ته ولېږدول شي.

د امریکایي رسنیو د راپورونو له مخې، د نیویارک فډرالي محکمې قاضي والري کاپروني د نومبر پر درېیمه د دغه پلان د ځنډولو حکم صادر کړی چې د روانې شنبې ورځې پورې به نافذ وي.

د راپورونو له مخې، د امریکا د کانګرېس ۶۶ غړو خبرداری ورکړی چې افغانستان ته د دغو افغان کډوالو بېرته ستنول ښايي هغوی د ځورونې، شکنجې او ان د مرګ له جدي ګواښونو سره مخ کړي.

په همدې حال کې، د افغان کډوالو د ملاتړ سازمان «افغان‌ایواک» هم اعلان کړی چې د افغانانو د لېږدولو پلان شوې الوتنه د پراخو فشارونو په پایله کې ځنډول شوې ده.

دغه سازمان ټینګار کړی چې د الوتنې ځنډېدل د دې معنا نه لري چې د افغان کډوالو د ایستلو موضوع په بشپړ ډول حل شوې ده؛ ځکه د یادو افغانانو د توقیف وضعیت لا هم پر خپل ځای دی او د هغوی د ایستلو پلان په رسمي ډول نه دی لغوه شوی.

د افغان‌ایواک او «هیومن رایټس فرسټ» سازمانونو د معلوماتو له مخې، له ۸۰ څخه ډېرو توقیف شویو افغانانو د احتمالي ایستلو او بېرته لېږلو په اړه له دغو سازمانونو سره اړیکې نیولې دي.

د بشري حقونو د فعالانو او د افغان کډوالو د ملاتړ سازمانونو اندېښنه دا ده چې افغانستان ته د دغو کډوالو بېرته ستنول ښايي د هغوی ژوند او خوندیتوب له جدي خطر سره مخ کړي.

د یادونې وړ ده چې د محکمې اوسنی حکم لنډمهالی دی او د افغان کډوالو د برخلیک په اړه وروستۍ پرېکړه لا نه ده شوې.