کابلټریبیون (کېټي)— د ملګرو ملتونو د ښځو څانګه وايي، د منځني ختیځ د شخړو د پراخېدو له امله ښايي د ۲۰۲۶ کال تر پایه په افغانستان او ۲۷ نورو هېوادونو کې ۱۱.۷ میلیونه نورې ښځې او نجونې د خوړو له ناامنۍ سره مخ شي.
د ملګرو ملتونو د ښځو څانګې د اجرائیوي مدیرې مرستیالې نیارادزای ګومبونزواندا ویلي، د شخړو د
پراخېدو له امله د خوړو ناامني په ځانګړي ډول پر ښځو او نجونو اغېز کولی شي.
د دې ادارې د نوي تحلیل له مخې، په افغانستان کې ښځې او نجونې د هغو
کسانو شاوخوا ۶۰ سلنه جوړوي چې ښايي د خوړو له ناامنۍ سره مخ شي.
ملګري ملتونه وايي، په افغانستان کې شاوخوا ۹۵ سلنه ښځې د کار له
بازار څخه بهر دي، چې له امله یې د اقتصادي ستونزو او د خوړو د ناامنۍ پر وړاندې د
هغوی زیانمنېدنه زیاته شوې ده.
د ملګرو ملتونو د ښځو څانګې په وینا، له ۸۰ سلنې ډېرې هغه ښځې چې په
افغانستان کې کار کوي، په زیانمنونکو دندو کې بوختې دي.
دغه اداره وايي، د شخړو، اقتصادي ستونزو او د کار بازار ته د ښځو د
محدود لاسرسي دوام کولی شي په افغانستان کې د ښځو او نجونو د خوړو او اقتصادي
امنیت وضعیت نور هم له ګواښ سره مخ کړي.
