کابلټریبیون (کېټي) - د هینګاو د بشري حقونو سازمان ویلي چې ایراني چارواکو د مشهد په مرکزي زندان کې درې بندیان اعدام کړي، چې دوه یې افغان وګړي وو.
د هینګاو د معلوماتو له مخې، ۵۲ کلن انصار نامي او ۴۶ کلن نظیف رسولخېل، چې دواړه افغانان وو، د سپټمبر په دویمه نېټه د مشهد په مرکزي زندان، چې د وکیلآباد زندان په نوم هم پېژندل کېږي، اعدام شول.
یاد بنسټ ویلي چې دغه دوه افغانان له خپلو کورنیو سره د وروستۍ لیدنې له اجازې پرته اعدام شوي دي.
د هینګاو په وینا، دواړه کسان شاوخوا دوه کاله مخکې په یوه نیمهجوړه ودانۍ کې د دوو کسانو د وژنې په تړاو نیول شوي وو او وروسته د ایران د «قصاص» د قوانینو له مخې د مرګ په سزا محکوم شول.
په همدې ورځ د مشهد یو ۲۲ کلن اوسېدونکی، امید رخشانې، هم په یاد زندان کې اعدام شو. هغه د قتل په تور نیول شوی و او وروسته د قصاص د قوانینو له مخې د مرګ په سزا محکوم شوی و.
د ایران دولتي رسنیو او قضايي چارواکو تر اوسه د دغو دریو کسانو د اعدام په اړه کومه رسمي عامه اعلامیه نه ده خپره کړې.
د هینګاو د بشري حقونو سازمان له خوا د دغو اعدامونو خپاره شوي معلومات په خپلواکه توګه نه دي تایید شوي.
