د امریکا ولسمشر ډونالډ ټرمپ ویلي، پر ایران یې پلان شوې حمله په موقتي توګه لغوه کړې ده.
ټرمپ ویلي چې دغه پرېکړه له تهران سره د یوه چټک تړون د ترلاسه کولو
په شرط شوې ده.
ټرمپ په ټولنیزه شبکه «ټروت سوشل» کې لیکلي چې ایران او د منځني ختیځ
یو شمېر هېوادونو له واشنګټن غوښتي چې له برید څخه ډډه وکړي، ځکه د ده په وینا، د
یوه تړون پر «چوکاټونو» هوکړه شوې ده.
د هغه په وینا، دغه تړون به د هرمز تنګي د بشپړ پرانیستلو او هغه څه
ته د پای ټکی کېږدي چې نوموړي د «ایران اټومي ګواښ» بللی دی.
په ورته وخت کې، د امریکا د بهرنیو چارو وزیر مارکو روبیو ادعا کړې چې
د واشنګټن وروستیو بریدونو د ایران دفاعي وړتیاوې په پراخه کچه کمزورې کړې او له
همدې امله تهران د خپل اټومي پروګرام او هرمز تنګي په اړه خبرو ته هڅول شوی دی.
روبیو ویلي، ایران لا هم توغندي او بېپیلوټه الوتکې لري، خو نور د
پخوا په څېر د مخنیوي وړتیا نه لري.
خو ایراني چارواکو دغه ادعاوې رد کړې او پر هرمز تنګي د تهران د
کنټرول پر دوام یې ټینګار کړی دی.
د ایران د ولسي جرګې د ملي امنیت او بهرني سیاست کمېسیون ویاند حسن
قشقاوي ویلي، په هرمز تنګي کې د بېړیو د تګ راتګ مدیریت به د ایران په واک کې پاتې
وي او تهران به د پوځي یا سیاسي فشار له امله له خپل دریځ څخه شاتګ ونه کړي.
همداراز، د ایران د ولسي جرګې د ملي امنیت کمېسیون غړي ابراهیم رضايي خبرداری
ورکړی چې که امریکا هر ډول برید وکړي، د ایران ځواب به د خلیج فارس سیمې پورې
محدود نه وي او ټول هغه پوځي اډې به په نښه کړي چې د برید سرچینه وي.
په همدې حال کې، د منځني ختیځ د انسټیټیوټ لوړپوړي څېړونکي راس هریسون
الجزیرې ته ویلي چې لا څرګنده نه ده چې د ټرمپ پرېکړه د کړکېچ د واقعي کمېدو نښه
ده که نه.
هغه ټینګار کړی چې د هرمز تنګي د بیا پرانیستلو په اړه د یوې روښانه
هوکړې تر نه شتون پورې، د جګړې د بیا پیل احتمال لا هم شته.
