په نورستان کې د طالبانو ولایت مقام ویاند فریدون صمیم وايي، راتلونکې اوونۍ به د کونړ–نورستان سړک د ډامبرولو چارې په رسمي ډول پیل شي.
د هغه په وینا، د ټولګټو چارو وزارت د دې سړک له روانو پرمختیایي
کارونو د ساحوي لیدنې پر مهال پرېکړه کړې، چې د یاد سړک ۲۲ کیلومتره برخه لا دمخه
د ډامبرولو لپاره چمتو شوې او په نږدې راتلونکي کې به یې عملي کارونه پیل شي.
نوموړي زیاته کړه، چې دغه سړک به د ۹ مترو په پراخوالي سره ډامبر شي.
د کونړ–نورستان سړک د هېواد په ختیځ کې له هغو مهمو زیربنایي لارو څخه
شمېرل کېږي چې د غرنیو سیمو د نښلولو ترڅنګ د سیمهییزې سوداګرۍ، تګ راتګ او
اقتصادي اړیکو په پراختیا کې مهم رول لري. د دې لارې د بشپړولو غوښتنه له کلونو
راهیسې د سیمې د اوسېدونکو له مهمو غوښتنو څخه وه.
