د طالبانو د رئیسالوزرا اقتصادي معاونیت وایي، نن (دوشنبه) د جوزجان ولایت په یتیمطاق سیمه کې د سمنټو د تولیدي فابریکې د جوړولو چارې پیل شوې دي.
د یادې ادارې په وینا، دغه فابریکه به د کانونو او پټرولیم وزارت او د
«۷۷» ترکي ساختماني شرکت ترمنځ د یوه تړون له مخې، د ۱۶۰ میلیونه امریکايي ډالرو
په پانګونه د دوو کلونو په موده کې جوړه شي.
د کانونو وزارت مسؤلین وایي، دا فابریکه به په ورځني ډول د درې زره مټریک
ټنه سمنټو د تولید ظرفیت ولري او د فعالیت له پیل سره به یې شاوخوا پنځه زره کسانو
ته مستقیم او غیرمستقیم کاري فرصتونه برابر شي.
د طالبانو د رئیسالوزرا اقتصادي مرستیال ملا عبدالغني برادر اخند د
پروژې د پیل په مراسمو کې ویلي، هڅه کوي چې افغانستان د سمنټو د تولید په برخه کې
پر ځان بسیا کړي او پر وارداتو تکیه کمه کړي.
په همدې حال کې، د کانونو او پټرولیم وزیر هدایتالله بدري هم ویلي چې
تر راتلونکي لوی اختر وروسته به په کندهار کې هم د سمنټو د تولید بهیر پیل شي، چې
دا به د هېواد د صنعتي ودې په برخه کې یو بل مهم ګام وي.
