پاکستان او هند به د يکشنبې په ورځ يو ځل بيا د اسيا جام په لوبه کې د کرکټ د سختو سياليو له لړۍ سره مخامخ شي، يوه اوونۍ وروسته له هغې چې د دوی وروستۍ لوبه د لاس نه ورکولو له امله لانجمنه شوې وه.
هند د سپټمبر په ۱۴مه نېټه د ډبی په لوبغالي کې د درې وېکټو په توپير ګروپي لوبه وګټله، او وروسته يې
له سيال ټيم سره د لاس ورکولو څخه ډډه وکړه چې دا پرېکړه لانجمنه وبلل شوه. دا د
دواړو ګاونډيانو لومړۍ مخامخ لوبه وه له هغې وروسته چې د مې په مياشت کې د څلور
ورځو سرحدي جګړه کې تر ۷۰ زيات کسان ووژل شول.
د پاکستان کرکټ بورډ (PCB) د نړيوال
کرکټ شورا (ICC) ته اعتراض وکړ او
ادعا يې وکړه چې د لوبې ريفري، انډي پاېکرافټ، د پاکستان لوبډلمشر سلمان علي اغا ته ويلي چې د ټاس پر مهال دې د هندوستان له سيال، سوريکمار يادف
سره د لاس ورکولو هڅه نه کوي. د پاکستان کرکټ بورډ
غوښتنه وکړه چې پاېکرافټ دې د دوی له لوبو لرې کړل شي او ګواښ يې وکړ
چې له دې اتو ټيمونو شل اووري سياليو څخه به وځي.
د دوی وروستۍ ګروپي لوبه يو ساعت وځنډېده تر څو چې PCB وويل پاېکرافټ بښنه وغوښته او لوبه، د همدې زيمبابوې ريفري تر څارنې
لاندې، ترسره شوه. پاکستان د کوربه متحدو عربي اماراتو لوبډله ماته کړه او د سوپر
فور پړاو ته يې لار وموندله، چېرې چې به يو ځل بيا له هند سره مخامخ کېږي.
د هندوستان رسنيو راپور ورکړی چې ټيم د يکشنبې د لوبې لپاره هم د لاس نه ورکولو پالیسي ته ژمن دی.
