کابلټریبیون (کېټي) — د امریکا مرستیال ولسمشر جيډي ونس وايي، ایران باید د خپل اټومي غني کولو په ظرفیت کې «د پام وړ» کموالی راولي، څو د واشنګټن غوښتنې پوره او له ایران سره اووه میاشتنی جګړه پای ته ورسېږي.
ونس له رویټرز سره په ځانګړې مرکه کې ویلي، هر ډول هوکړه باید ایران
اړ کړي چې د یورانیمو د غني کولو ظرفیت کم کړي، نه دا چې یوازې په راتلونکي کې د
اټومي فعالیتونو د کمولو ژمنه وکړي.
هغه ویلي، که ایران د اټومي وسلې د نه جوړولو په اړه جدي ژمنتیا لري،
باید د یورانیمو د غني کولو په ظرفیت کې «د پام وړ» بدلون راولي.
ونس ویلي: «که تاسو اټومي وسله نه غواړئ، نو ولې ۶۰ سلنه غني شوی سونتوکی
ته اړتیا لرئ؟ او که غواړئ د اټومي وسلې د نه جوړولو ژمنتیا وښیئ، نو ډېر غني شوی
سونتوکی مه جوړوئ.»
د امریکا مرستیال ولسمشر د ایران او امریکا ترمنځ د خبرو په بهیر کې
مهم رول لري. نوموړي د جون په میاشت کې د جګړې د پای ته رسولو لپاره د یوې موقتي
سولې په هوکړه کې هم منځګړیتوب کړی و، خو هغه هوکړه ډېر ژر له منځه ولاړه.
ایران او امریکا په وروستیو اوونیو کې د جګړې د پای ته رسولو او د
هرمز تنګي د بېرته پرانیستلو لپاره یو بل ته وړاندیزونه وړاندې کړي دي. د هرمز
تنګی د نړۍ د انرژۍ د لېږد یوه مهمه سمندري لار ده.
د راپور له مخې، د جګړې دوام د نړۍ د انرژۍ بازارونه اغېزمن کړي او د
نومبر د منځمهاله ټاکنو په درشل کې د امریکا د ولسمشر ډونالډ ټرمپ د ادارې لپاره
هم سیاسي ستونزه رامنځته کړې ده.
ټرمپ د تهران وروستی وړاندیز رد کړی او خبرداری یې ورکړی چې د نومبر
له منځمهاله ټاکنو وروسته د ایران پر ضد پوځي عملیات لا هم پراخېدای شي.
