د افغانستان او پاکستان لپاره د ملګرو ملتونو پخوانی استازی بنون سیوان په ۸۸ کلنۍ کې مړ شو

کابل‌ټریبیون (کې‌ټي) — د افغانستان او پاکستان لپاره د ملګرو ملتونو پخوانی استازی او قبرصي ډیپلوماټ بنون سیوان د ۸۸ کلونو په عمر مړ شوی دی.

د «سایپرس مېل» ورځپاڼې د راپور له مخې، سیوان د دوشنبې په ورځ، د تلې په ۱۳مه، وفات شوی دی. د ارمنستان عمومي خیریه اتحادیې هم د هغه مړینه تایید کړې ده.

سیوان په ۱۹۶۵ کال کې د ملګرو ملتونو له دارالانشاء سره یوځای شو او د څو لسیزو په ترڅ کې یې د دغه سازمان په بېلابېلو برخو کې دندې ترسره کړې.

هغه په ۱۹۸۸ کال کې د افغانستان د کړکېچ د حل په بهیر کې د ملګرو ملتونو د سرمنشي د استازي د دفتر د مدیر او لوړپوړي سیاسي سلاکار په توګه وټاکل شو.

په ۱۹۸۹ کال کې سیوان د افغانستان او پاکستان لپاره د ملګرو ملتونو د سرمنشي د شخصي استازي په توګه وټاکل شو. هغه په دې دنده کې د افغانستان په اړه د ژنیو د هوکړو د پلي کېدو او د دغه هېواد د جګړې د سیاسي حل لپاره د ملګرو ملتونو په هڅو کې ونډه واخیسته.

په ۱۹۹۰ کال کې، د افغانستان او پاکستان لپاره د ملګرو ملتونو د څارنې د ماموریت له پای ته رسېدو وروسته، د ملګرو ملتونو د سرمنشي دفتر په افغانستان او پاکستان کې جوړ شو او سیوان یې مشري پر غاړه واخیسته.

هغه په همدې کال د افغانستان په اړه د ژنیو د هوکړو د پلي کولو لپاره د ملګرو ملتونو د سرمنشي د استازي په توګه هم وټاکل شو او په ۱۹۹۱ کال کې یې د افغانستان لپاره د ملګرو ملتونو د بشري او اقتصادي مرستو د پروګرامونو د همغږۍ مسئولیت پر غاړه واخیست.

سیوان په دغه موده کې د شوروي ځواکونو له افغانستانه د وتلو، د ژنیو د هوکړو د پلي کېدو، د کډوالو د بېرته ستنېدو او د افغانستان د جګړې د پای ته رسولو لپاره له ډیپلوماتیکو هڅو سره تړلو موضوعاتو کې کار وکړ.

هغه په ۱۹۹۲ کال کې د ملګرو ملتونو د سرمنشي د سیاسي چارو د مرستیال په توګه وټاکل شو.

سیوان وروسته له ۱۹۹۵ څخه تر ۲۰۰۳ کال پورې په عراق کې د ملګرو ملتونو د «نفت د خوړو په بدل کې» پروګرام مشري وکړه.

هغه په ۲۰۰۳ کال کې په بغداد کې د کانال هوټل له خونړۍ چاودنې هم ژوندی پاتې شو. په دې چاودنه کې د ملګرو ملتونو ۲۲ کارکوونکي ووژل شول، چې په عراق کې د ملګرو ملتونو د سرمنشي ځانګړی استازی سرجیو ویرا د مېلو هم پکې شامل و.

سیوان د افغانستان د جګړې د سیاسي حل، د ژنیو د هوکړو د پلي کېدو او د بشري مرستو د همغږۍ په برخه کې د ملګرو ملتونو د مهمو ډیپلوماتیکو هڅو پر مهال له اغېزناکو چارواکو څخه و.