کابلټریبیون (کېټي)— د ایران د خراسان رضوي ولایت د پولې ساتونکو قوماندان وايي، د روان کال له پیل څخه د تلې تر اوومې پورې د دغه ولایت په پولو کې ۱۴۵ زره او ۵۲۰ افغان وګړي د غیرقانوني راتګ پر مهال نیول شوي دي.
مجید شجاع د چهارشنبې په ورځ د ایراني پولیسو اوونیز خبري
غونډې ته وویل، نیول شوي افغانان د
افغانستان چارواکو ته سپارل شوي او بېرته دغه هېواد ته ستانه کړل شوي دي.
د هغه په وینا، د تېر کال په لومړیو شپږو میاشتو کې د خراسان رضوي په پولو کې کې ۳۹ زره او ۳۱۱ ناقانونه افغان وګړي نیول شوي وو. شجاع وویل، د روان او تېر کال د شمېرو پرتله ښيي چې د
ناقانونه تګ راتګ د نیول کېدو کچه شاوخوا ۴.۵ برابره لوړه شوې ده.
هغه زیاته کړه چې د ۱۲ ورځنۍ جګړې او د کال په وروستیو ورځو کې د نښتو
له پای ته رسېدو وروسته هم د افغانستان د اتباعو له لوري ایران ته د ناقانونه
ننوتلو هڅې روانې دي.
شجاع وویل، د ناقانونه کډوالو نیول او بېرته ستنول د ایران د پولې ساتنې ادارې ته د پام وړ لګښتونه اړولي دي. د هغه په وینا، ځینې وخت پولهساتونکي د بشري
دلایلو له مخې خپله خوراکي برخه هغو کسانو ته ورکوي چې له لوږې او سختو شرایطو سره
مخ وي.
هغه له افغان اتباعو وغوښتل چې ایران ته د تګ لپاره له قانوني لارو
استفاده وکړي.
شجاع همداراز وویل، د روان کال له پیل څخه تر اوسه د خراسان رضوي په
سرحدونو کې شاوخوا ۱.۵ ټنه بېلابېل ډول نشهيي توکي نیول شوي چې د تېر کال د ورته
مودې په پرتله دوه برابره زیاتوالی ښيي.
د هغه په وینا، په سرحدونو کې ۱۱۰ میله ښکار او پوځي وسلې هم کشف او
ضبط شوې دي.
هغه زیاته کړه چې له خراسان رضوي څخه د تېلو او نورو توکو قاچاق د
مسافرو د بار او یا له پولې څخه د تېرېدونکو موټرو له لارې ترسره کېږي. د هغه په
وینا، د روان کال په لومړیو شپږو میاشتو کې د کشف شویو قاچاقي توکو ارزښت ۲۶ سلنه
زیات شوی دی.
