کابلټریبیون (کېټي)— ایټالوي ډیپلوماټ نیکولا بېلومو په افغانستان کې د اروپايي ټولنې د شارژدافیر په توګه خپله نوې دنده پیل کړې ده. نوموړی د ویرونیکا بوشکوویچ پوهار ځای ناستی شوی، چې د ۲۰۲۴ کال له سپټمبر راهیسې یې دغه دنده ترسره کوله.
بېلومو په اېکس کې د خپلې نوې دندې خبر ورکړی او ویلي یې دي چې په
افغانستان کې د اروپايي ټولنې د ګټو او ارزښتونو د استازیتوب لپاره دا دنده «په
ډېر ویاړ» پیلوي.
بېلومو ویلي: «زه دا نوې دنده د تل په څېر په هماغه لېوالتیا او په
افغانستان کې د اروپايي ټولنې د ګټو او ارزښتونو د استازیتوب په ډېر ویاړ سره
پیلوم.»
د اروپايي بهرني اقدام خدمت (EEAS) د جون په
میاشت کې د بېلومو د ټاکنې اعلان کړی و او هغه یې په افغانستان کې د راتلونکي
سرپرست شارژدافیر په توګه معرفي کړی و. نوموړي تر دې ټاکنې مخکې د دغه سازمان د پانافریقايي
چارو د څانګې مشري کوله او له دې وړاندې یې په روانډا کې د اروپايي ټولنې د سفیر
په توګه دنده ترسره کړې وه.
بېلومو د بوشکوویچ پوهار ځای ناستی شوی، چې یوه سلووینیايي ډیپلوماټه
ده. نوموړې د ۲۰۲۴ کال په اپرېل کې په افغانستان کې د اروپايي ټولنې د پلاوي د
مشرې په توګه ونومول شوه او د همدې کال په سپټمبر کې یې د شارژدافیر په توګه دنده
پیل کړه. کابل ته تر راتګ مخکې نوموړې د اروپايي ټولنې په سیاسي او امنیتي کمېټه
کې د سلووینیا استازیتوب کاوه.
دا د مشرتابه بدلون په داسې مهال کېږي چې اروپايي ټولنه په افغانستان
کې له دې سره سره ډیپلوماټیک حضور ساتي چې د طالبانو اداره په رسمیت نه پېژني.
اروپايي ټولنه لا هم د افغانستان له مهمو نړیوالو مرستندویانو څخه ده.
په وروستیو اوونیو کې دې ټولنې د اقتصادي انعطاف، راستنېدونکو، کرنې او د اقلیمي
بدلون سره د تطابق په برخو کې د پروګرامونو لپاره د نوې مالي مرستې اعلان کړی دی.
په دغو مرستو کې له اغا خان بنسټ سره د ۱۰ میلیونه یورو نوښت او د ملګرو ملتونو د
خوړو او کرنې له سازمان سره د ۵ میلیونه یورو پروژه شامله ده.
