کابل ټریبیون (کابلټریبیون) — نږدې ۸۰ هېوادونو په یوه ګډه اعلامیه کې د هرمز تنګي د سمدستي او بشپړ پرانیستلو غوښتنه کړې او په سیمه کې یې د ایران د حکومت او د هغه د متحدو حوثیانو اقدامات غندلي دي.
د رویټرز د راپور له مخې، د بحرین د بهرنیو چارو وزیر عبداللطیف بن
راشد الزیاني دغه ګډه اعلامیه د پنجشنبې په ورځ په ملګرو ملتونو کې ولوستله. د
خلیج عربي هېوادونه او د لویدیځ یو شمېر لوی قدرتونه د دې اعلامیې له ملاتړو څخه
دي..
په اعلامیه کې ویل شوي چې «په هرمز تنګي کې د ایران د حکومت اقدامات
لا هم نړیوال امنیت او د بېړۍ چلونې حقونه او ازادۍ ګواښي.»
لاسلیک کوونکو هېوادونو د هرمز تنګي له لارې د بېړیو د خوندي، امن او
بېخنډه تګ راتګ پر اړتیا ټینګار کړی دی.
دوی همداراز په یمن کې د حوثیانو له لوري د جګړو د بیا پیل پرېکړه، پر
سعودي عربستان دوامدار بریدونه او په سره سمندرګي کې «بېپروا» بریدونه په کلکه
غندلي دي.
په اعلامیه کې خبرداری ورکړل شوی چې د بابالمندب تنګي پر لور د
حوثیانو پرمختګ به د نړیوالې بېړۍ چلونې، سمندري امنیت او نړیوالې سوداګرۍ پر
وړاندې خطرونه زیات کړي.
حوثیان د ایران له ملاتړ څخه برخمنه ډله بلل کېږي، خو ایران د سیمې په
اړه د شویو ګڼو تورونو په تړاو خپل دریځونه لري.
