کابلټریبیون (کېټي)— د خیبر پښتونخوا په کوهاټ سیمه کې د پولیسو پر لاینز له خونړي برید وروسته د پولیسو او امنیتي ځواکونو په ګډو عملیاتو کې اته وسلهوال وژل شوي دي.
د مرکزي پولیس دفتر په یوه خبرپاڼه کې د شنبې په ورځ ویلي چې
پولیسو او امنیتي ځواکونو د جمعې په ورځ د پولیسو لاینز دننه پر یوه جومات له برید
وروسته ګډ عملیات ترسره کړل.
د چارواکو په وینا، په چاودنه کې لږ تر لږه ۲۲ کسان، چې ۱۶ یې پولیس
وو، وژل شوي او ۱۰۳ نور ټپیان شوي دي.
د خیبر پښتونخوا د پولیسو مشر ذوالفقار حامد تر دې مخکې جیو نیوز ته
ویلي وو چې له چاودېدونکو توکو ډک موټر د پولیسو د پخوانیو لاینز له دروازې سره
ټکر وکړ او وروسته وچاودېد. هغه زیاته کړې وه چې د چاودنې پر مهال ډزې
هم شوې دي.
حامد ویلي وو چې له وسلهوالو سره د نښتې پر مهال د پولیسو د ځانګړې
څانګې په ودانۍ کې هم یوه ځانمرګې چاودنه شوې ده.
د مرکزي پولیس دفتر په وینا، د عملیاتو پر مهال د ایلیټ فورس کمانډو،
د ترهګرۍ ضد مبارزې څانګې (CTD) او
امنیتي ځواکونو د پولیسو د لاینز مهمې برخې تصفیه کړې.
د چارواکو په وینا، د عملیاتو مشري د CTD اضافي
عمومي مفتش، د سیمهییز پولیس افسر او د کوهاټ د ولسوالۍ د پولیسو افسر کوله. د
پولیسو مشر او نورو لوړپوړو چارواکو هم د عملیاتو تر پای پورې په سیمه کې حضور
درلود.
حامد ویلي چې امنیتي ځواکونو د شپې له عملیاتو وروسته بریا ترلاسه کړه
او پولیسو، CTD او امنیتي ځواکونو په عملیاتو کې «زړورتیا»
ښودلې ده.
د پوځ عملیات
په ورته وخت کې، امنیتي سرچینو ویلي چې پاکستاني پوځ د سهار له لمانځه
وروسته عملیات پیل کړل او په پولیسو لاینز کې یې دوه ځانمرګي بریدګر ووژل چې هلته
پټ شوي وو.
امنیتي سرچینو ویلي چې په عملیاتو کې اووه وسلهوال وژل شوي دي. د
سرچینو په وینا، عملیات د کوهاټ د قول اردو د عمومي قوماندان تر مستقیمې څارنې
لاندې ترسره شول.
سرچینو زیاته کړې چې د پوځ کمانډو او سرتېرو د بمونو شنډولو له ډلې
سره یوځای سیمه پاکه کړه او وروسته یې پولیسو ته وسپارله.
د محکمې پر پولیس پوسته ډزې
په یوه جلا پېښه کې، وسلهوالو د کوهاټ د ولسوالۍ د محاکمو د اصلي
دروازې پر پولیس پوسته ډزې کړې دي.
پولیس وايي، په دې پېښه کې چاته مرګژوبله نه ده اوښتې، خو د پولیسو
پوسته زیانمنه شوې ده.
چارواکو ویلي چې د امنیتي تدابیرو د زیاتولو له امله د پولیسو لاینز
ته څېرمه ټول دفترونه او ولسوالۍ محکمې تړل شوې دي.
په کوهاټ کې بیړنی حالت هم اعلان شوی او پولیسو د ښار په ټولو ورودي
او وتلو لارو کې امنیتي پلټنې سختې کړې دي.
