په افغانستان کې د سرطان ناروغۍ پر وړاندې د مبارزې بنسټ وايي، په هېواد کې اوس مهال لږ تر لږه یو نیم میلیون کسان پر سرطان اخته دي او هر کال شاوخوا ۵۰ زره نوې پېښې ثبتېږي.
د سرطان ناروغۍ پر وړاندې د مبارزې بنسټ په افغانستان کې د سرطان
ناروغۍ د پېښو له زیاتېدو اندېښنه څرګنده کړې ده.
دغه بنسټ د شنبې په ورځ، د وږي په ۲۱مه،
ویلي چې په افغانستان کې د سرطان د ناروغانو شمېر لږ تر لږه یو نیم میلیون ته
رسېږي.
د بنسټ د معلوماتو له مخې، هر کال په هېواد کې شاوخوا ۵۰ زره د سرطان
نوې پېښې ثبتېږي. ویل شوي چې دغه شمېرې د طالبانو د عامې روغتیا وزارت د معلوماتو
او د نړیوالو سازمانونو د راپورونو پر بنسټ چمتو شوې دي.
د افغانستان د سرطان ناروغۍ پر وړاندې د مبارزې بنسټ مشر، شفیق
شینواري، ویلي چې د ملي او نړیوالو اټکلونو له مخې، د ښځو ترمنځ د سینې او رحم
سرطان، او د نارینهوو ترمنځ د سږو، معدې، پروسټات او کولمو سرطانونه تر ټولو ډېر
لیدل کېږي.
نوموړي ویلي چې له زړه ناروغیو وروسته، سرطان هر کال په افغانستان کې
د ډېرو مړینو لامل کېږي.
په همدې حال کې، د سرطان متخصص ډاکټر رحیم ګل درویش وايي چې د سګرټو
او نسوارو استعمال، د روغتیايي اصولو نه مراعاتول او ناسالم غذایي رژیم په هېواد
کې د سرطان ناروغۍ د زیاتېدو له مهمو عواملو څخه دي.
د طالبانو د عامې روغتیا وزارت ویاند، شرافت زمان امرخېل، ویلي چې اوس
مهال په هېواد کې د سرطان د درملنې لسګونه مرکزونه فعال دي.
خو نوموړي ټینګار کړی چې روغتیايي نظام د سرطان د درملنې په برخه کې د
اړینو طبي وسایلو او امکاناتو له جدي کمښت سره مخ دی.
د راپورونو له مخې، په ۱۴۰۰ لمریز کال کې د طالبانو له بیا واکمنېدو
وروسته، سلګونه متخصص ډاکټران له افغانستان څخه لوېدیځو هېوادونو ته کډوال شوي دي.
د متخصصو کادرونو ترڅنګ، د طبي وسایلو او درملنې د امکاناتو کمښت هم د سرطان
ناروغانو لپاره ستونزې زیاتې کړې دي.
افغانستان کې یو شمېر سرطان ناروغان په تېرو کلونو کې د درملنې لپاره
پاکستان ته تلل، خو د سرحدي لارو تړل کېدو او د پاکستان د ویزو د ترلاسه کولو په
برخه کې د محدودیتونو له امله د دغو ناروغانو د درملنې بهیر له خنډونو سره مخ شوی
دی.
ډاکټران وايي، د سرطان درملنه دوامدارې طبي پاملرنې او متخصص ډاکټر ته
منظمې مراجعې ته اړتیا لري؛ خو په افغانستان کې د درملنې د امکاناتو کمښت او د تګ
راتګ محدودیتونه د ډېرو ناروغانو د درملنې بهیر له ستونزو سره مخ کړی او د هغوی د
مړینې خطر یې زیات کړی دی.
