کابلټریبیون (کېټي)— د پولیو د له منځه وړلو لپاره د پاکستان د ملي بېړنیو عملیاتو مرکز د روان کال د پولیو څلورمه پېښه تایید کړې چې د خیبر پښتونخوا په بنو ولسوالۍ کې ثبت شوې ده.
د پولیو د له منځه وړلو پروګرام د جمعې په ورځ په یوه اعلامیه کې له
والدینو او د ماشومانو له پالونکو وغوښتل چې خپل ماشومان د سپټمبر له ۲۱مې تر ۲۷مې
پورې په راتلونکي کور په کور واکسین کمپاین کې او له هغه وروسته په ټولو کمپاینونو
کې واکسین کړي.
د پروګرام په وینا، د روان کال له څلورو ثبت شویو پېښو څخه درې یې په
جنوبي خیبر پښتونخوا کې دي. چارواکي وايي، په دې سیمه کې امنیتي ستونزې د واکسین
ټیمونو د فعالیت او ماشومانو ته د واکسین رسولو پر وړاندې خنډ شوې دي.
د پولیو پروګرام په اعلامیه کې ویل شوي چې پاکستان د خوندي او اغېزمن
واکسین له لارې د پولیو پېښې ۹۹.۸ سلنه راکمې کړې دي. د چارواکو په وینا، د ۱۹۹۰مو
کلونو له لومړیو کې د اټکل شویو ۲۰ زرو پېښو شمېر په ۲۰۲۵ کال کې ۳۱ پېښو ته راټیټ
شوی و.
په اعلامیه کې راغلي چې که څه هم په ټول پاکستان کې د پولیو ویروس
انتقال د ۲۰۲۵ کال راهیسې کم شوی، خو په جنوبي خیبر پښتونخوا کې لا هم د ویروس
خپرېدل دوام لري.
د پولیو پروګرام وايي، نوې پېښه د دې اړتیا څرګندوي چې په ټول هېواد
کې د پولیو د څارنې او واکسیناسیون هڅې پیاوړې او دوامداره وساتل شي.
