کابلټریبیون (کېټي)--د افغانستان لپاره د ملګرو ملتونو بشري حقونو ځانګړي راپور ورکوونکي، ریچارډ بېنېټ، ویلي چې د ملګرو ملتونو د بشري حقونو شورا به د دوشنبې په ورځ په افغانستان کې د بشري حقونو د وضعیت په اړه یوه غونډه ترسره کړي.
ټاکل شوې ده چې دا غونډه د اروپا د مرکزي وخت له مخې په۲:۱۵ او د افغانستان پر وخت په۶:۴۵ پیل شي او په ژوندۍ بڼه به خپره شي.
دا غونډه په داسې حال کې ترسره کېږي چې پر افغان ښځو او نجونو د طالبانو بندیزونه، د طالبانو له بیا واک ته رسېدو پنځه کاله وروسته، لا هم سخت دي.
افغانستان د نړۍ یوازینی هېواد دی چې نجونې پکې له شپږم ټولګي وروسته له زدهکړو منع دي. د ملګرو ملتونو د وروستیو شمېرو له مخې، شاوخوا ۲.۴ میلیونه نجونې له ثانوي زدهکړو بېبرخې دي.
طالبانو پر ښځو د کار، زدهکړو، تګ راتګ او په عامه ژوند کې د ګډون په برخه کې پراخ محدودیتونه لګولي دي.
د ملګرو ملتونو د ښځو ادارې د ۲۰۲۶ کال په یوې وروستۍ څېړنه کې ویلي چې ۹۰ سلنه سروې شوو افغان ښځو د کور پرېښودو لپاره د کورنۍ د یوه نارینه غړي اجازې ته اړتیا لرله. د سروې له مخې، له نیمایي ډېرې ښځې په میاشت کې یوازې دوه ځله یا تر دې هم لږ له خپلو کورونو وځي.
دا غونډه په داسې حال کې کېږي چې ریچارډ بېنېټ او د ملګرو ملتونو نورو کارپوهانو په وار وار خبرداری ورکړی چې په افغانستان کې د ښځو او نجونو پر وړاندې سیستماتیک تبعیض او ځپنه ښايي د جنسیت پر بنسټ د ځورونې کچې ته ورسېږي.
د ملګرو ملتونو کارپوهانو له طالبانو غوښتي چې د ښځو پر زدهکړو، کار، تګ راتګ او په عامه ژوند کې د ګډون محدودیتونه لغوه کړي.
طالبانو د خپلو پالیسیو دفاع کړې او ویلي یې دي چې دا د اسلامي شریعت او افغان کلتور د دوی له تفسیر سره سمې دي، خو د طالبانو دغه تګلارې له پراخې نړیوالې نیوکې او غندنې سره مخ شوې دي.
