کابلټریبیون (کېټي)-- بوسنیايي سرحدي پولیسو د کرویشیا پولې ته نږدې ۹۶ کډوال نیولي چې د هغوی له ډلې ۱۸ افغان وګړي دي.
د بوسنیا پولیسو د چهارشنبې په ورځ په دوو جلا عملیاتو کې د ۹۶ کډوالو
د غیرقانوني تګ مخه ونیوله.
په لومړیو عملیاتو کې، د بیستریتسا په سیمه کې ۶۳ کسان ونیول شول چې ۴۰
یې د پاکستان او ۲۳ نور د بنګلهدېش وګړي وو.
پولیسو د هماغې ورځې په ماښام د ۳۳ کډوالو یوه بله ډله هم ونیوله چې ۱۸
افغانان، ۱۳ بنګلهدېشیان او دوه پاکستانیان پکې شامل وو.
د بوسنیا رسنیو د سرحدي پولیسو په حواله راپور ورکړی چې دغو کډوالو
غوښتل په غیرقانوني ډول د کرویشیا له پولې واوړي. پولیسو د کډوالو د لېږد لپاره
دوه کښتۍ هم ضبط کړې دي.
ټول نیول شوي کډوال د بوسنیا د امنیت وزارت د بهرنیو اتباعو ادارې ته
سپارل شوي دي.
د بوسنیا د امنیت وزارت د شمېرو له مخې، د روان کال په لومړیو څلورو
میاشتو کې دې هېواد ته د غیرقانوني کډوالو د ننوتلو شمېر د تېر کال د همدې مودې په
پرتله شاوخوا ۶۷ سلنه زیات شوی دی.
د کډوالۍ نړیوال سازمان د شمېرو له مخې، د اوړي په میاشتو کې هم هره
میاشت له ۱۱۰۰ څخه ډېر غیرقانوني کډوال په بوسنیا کې پېژندل شوي دي.
ډېری کډوال بوسنیا د اروپايي ټولنې هېوادونو ته د رسېدو لپاره د
ترانزیټي لارې په توګه کاروي او په اوسط ډول شاوخوا دوه اوونۍ په دې هېواد کې پاتې
کېږي، څو د کرویشیا له پولې د اوښتو لاره ومومي.
