کابلټریبیون (کېټي)-- د ملګرو ملتونو د بشري چارو د همغږۍ دفتر (اوچا) وايي، په افغانستان کې د بشري مرستو پر وړاندې محدودیتونو د جولای په میاشت کې د ۱۸ مرستندویه پروګرامونو د لنډمهال ځنډېدو لامل شوي.
د اوچا په وینا، د ښځو
پر کار او ګډون محدودیتونو هم د مرستندویه فعالیتونو پر بهیر اغېز کړی دی.
اوچا په خپله نوې ارزونه کې ویلي چې د جولای په میاشت کې یې د بشري
مرستو د لاسرسي ۳۰ پېښې ثبت کړې دي. که څه هم دا شمېر د جون میاشتې د ۶۰ پېښو په
پرتله ۵۰ سلنه کم شوی، خو د دغو محدودیتونو عملي اغېزې لا هم د پام وړ دي.
د راپور له مخې، له دغو ۳۰ پېښو څخه ۱۸ د بشري مرستو د پروګرامونو د
لنډمهال ځنډېدو او دوه نورې د مرستندویه مرکزونو د موقتي تړل کېدو لامل شوې. د
جولای تر پایه ۱۱ پېښې هوارې شوې وې، خو ۱۹ نورې لا هم ناحل شوې پاتې وې.
اوچا ویلي چې په بشري فعالیتونو کې لاسوهنه د لاسرسي تر ټولو ډېره
راپور شوې ستونزه وه او ۱۶ پېښې یې جوړولې. پر مرستندویه کارکوونکو، شتمنیو او
مرکزونو د تاوتریخوالي ۱۲ پېښې ثبت شوې، په داسې حال کې چې دوه پېښې د مرستندویه
ادارو، کارکوونکو او توکو د تګ راتګ له محدودیتونو سره تړاو لرلو.
د ښځو پر ګډون محدودیتونه
د اوچا د راپور له مخې، د جولای په میاشت کې د جنسیت اړوند محدودیتونو
۱۱ پېښې ثبت شوې. په دغو پېښو کې د ښځینه مرستندویه کارکوونکو د ګډون محدودول، د
ښځو لپاره د محرم د ملتیا شرط، د لباس د اصولو پلي کول او د ښځو پر ګمارنه او
خدماتو ته د هغوی پر لاسرسي محدودیتونه شامل دي.
په ارزګان ولایت کې، د ښځینه معلومات راټولوونکو لپاره مخکې ورکړل شوې
اجازه د معلوماتو راټولولو له پیلېدو سره سم بېرته واخیستل شوه.
اوچا ویلي چې د ښځو پر بشري فعالیتونو محدودیتونه د مرستندویه ادارو
وړتیا اغېزمنولی شي، په ځانګړي ډول د اړمنو ښځو او نجونو د مرستې ترلاسه کولو په
برخه کې.
مرستندویه کارکوونکي نیول شوي
اوچا د بشري مرستندویه کارکوونکو، شتمنیو او مرکزونو پر وړاندې د
تاوتریخوالي ۱۲ پېښې هم ثبت کړې دي.
په هرات ولایت کې، د یوه ساختماني کار د لنډمهال ځنډ پر مهال یو د
ساختماني چارو څارونکی، یو امنیتي ساتونکی او پنځه کارګران ونیول شول. ډېری نیول
شوي کسان وروسته خوشې شول، خو د ساختماني چارو څارونکی د جولای تر ۲۸مې پورې په
بند کې پاتې و.
په یوه بله پېښه کې هم په هرات کې دوه مرستندویه کارکوونکي نیول شوي
وو.
د راپور د لنډیز له مخې، د جولای په میاشت کې هېڅ مرستندویه کارکوونکی
نه دی وژل شوی، ټپي شوی او یا تښتول شوی، خو ۱۲ کارکوونکي نیول شوي وو.
