کابلټریبیون (کېټي) – د روغتیا نړیوال سازمان وايي، د جولای په میاشت کې په افغانستان کې د ډینګي تبې، کووېډ-۱۹، نس ناستې او تنفسي ناروغیو پېښې د تېرې میاشتې په پرتله زیاتې شوې دي.
د روغتیا نړیوال سازمان په راپور کې ویلي، موسمي ناروغیو او د
روغتیايي امکاناتو کمښت د افغانستان پر کمزوري روغتیايي نظام فشار لا زیات کړی دی.
د افغانستان روغتیايي سیسټم لادمخه د مالي، روغتیايي کارکوونکو او بنسټیزو خدمتونو
له کمښت سره مخ دی.
د راپور له مخې، په جولای کې د ډینګي تبې ۴۷۳ مشکوکې پېښې ثبت شوې چې
د جون د ۲۵۵ پېښو په پرتله ۸۵.۵ سلنه زیاتوالی ښيي. له جنوري راهیسې د ډینګي تبې
له امله د مړینې کومه پېښه نه ده ثبت شوې.
د روغتیا نړیوال سازمان وايي، د ډینګي د پېښو زیاتوالی د تېرو درېیو
کلونو له موسمي وضعیت سره سمون لري.
د کووېډ-۱۹ پېښې هم زیاتې شوي
په جولای کې د کووېډ-۱۹ تایید شوې پېښې ۷۹.۳ سلنه زیاتې شوې دي. په
جون کې ۸۷ پېښې ثبت شوې وې، خو په جولای کې دغه شمېر ۱۵۶ ته لوړ شوی دی.
د راپور له مخې، د مشکوکو کووېډ-۱۹ پېښو ۱،۴۸۸ نمونې په دولتي
لابراتوارونو کې ازمویل شوې چې ۱۰.۵ سلنه یې مثبتې وې. له جنوري راهیسې د کووېډ-۱۹
له امله د مړینې کومه پېښه نه ده ثبت شوې.
له اوبو کموالي سره د حادې اوبهناکې نس ناستې پېښې هم ۳۱.۶ سلنه
زیاتې شوې دي. د دغو پېښو شمېر په جون کې ۱۸،۲۳۲ و، خو په جولای کې ۲۳،۹۸۵ ته لوړ
شوی دی.
په جولای کې د دغې ناروغۍ له امله ۱۴ کسان مړه شوي چې د جون له شمېر
سره برابر دی. د روغتیا نړیوال سازمان وايي، د دغې ناروغۍ د پېښو زیاتوالی د هغې
له کلني موسمي وضعیت سره سمون لري.
د تنفسي ناروغیو له امله ۱۹۸ مړینې
د روغتیا نړیوال سازمان په جولای کې د حادې تنفسي ناروغۍ او سینهبغل ۷۸،۰۸۲
پېښې ثبت کړې چې د جون په پرتله ۱۸.۹ سلنه زیاتوالی ښيي.
