کابل ټریبیون— د افغانستان کرکټ ملي لوبډلې د راشد خان د غوره توپ اچونې او د ابراهیم ځدراڼ د ځلېدونکي توپوهنې په مټ ایرلنډ ته د یو ورځنۍ نړیوالې لوبلړۍ په دویمه لوبه کې د ۹۲ منډو په توپیر ماتې ورکړه.
د باران له امله د لوبلړۍ (سیریز) لومړۍ لوبه بېپایلې پاتې شوې وه، نو د جمعې ورځې سیالي د سیریز لومړنۍ پرېکړه کوونکې لوبه وه.
افغانستان، چې لومړی یې توپ وهنه وکړه، په هغه لوبه کې چې د لمدې لوبغالي له امله ۴۷ اورونو ته راکمه شوې وه، د اتو لوبغاړو په سوځېدو ۲۹۹ منډې جوړې کړې. ابراهیم ځدراڼ د ۸۴ منډو په جوړولو د افغانستان د پاڼۍ تر ټولو ډېرې منډې، صدیق الله اتل ۴۵ منډې او مخکیني لوبډلمشر حشمت الله شاهدي په یوازې ۲۱ توپونو ناسوځېدلې ۳۶ منډې جوړې کړې.
د ایرلنډ له لوري مارک اډیر دوه ویکټې واخیستې، او نوی توپ اچوونکی جای مونډرا هم د دوو ویکټو په اخیستو بریالی شو.
ایرلنډ د ۳۰۰ منډو هدف په تعقیب ښه پیل وکړ. کېډ کارمایکل د خپلې لوبډلې لپاره ۶۲ او انډي بالبیرني ۳۶ منډې جوړې کړې او دواړو د دویمې ویکټې لپاره ۷۲ منډې ملګرتیا وکړه.
خو د لوبې برخلیک هغه مهال بدل شو چې لورکان ټکر د صدیق الله اتل د مستقیم ګوزار په وسیله رن اوټ شو. له دې وروسته د ایرلنډ توپ وهنه سسته شوه او لوبډلې خپلې وروستۍ اووه ویکټې یوازې د ۶۳ منډو په بدل کې له لاسه ورکړې.
راشد خان د افغانستان د بریا اصلي اتل و. هغه د ۳۴ منډو په بدل کې شپږ ویکټې واخیستې او د ایرلنډ د منځني او وروستي قطار توپ وهونکي یې له منځه یوړل. دا په یو ورځنیو نړیوالو سیالیو کې درېیم ځل دی چې راشد خان شپږ ویکټې اخلي.
