د دایکندي ولایت د طالبانو د رسنیو دفتر خبر ورکړی چې درې ځوانان د دغه ولایت په لزیر سیند کې د لمبېدو پر مهال اوبو ډوب کړي او مړه شوي دي.
د سرچینې په وینا، دغه ځوانان چې عمرونه یې د ۲۱ او ۲۲ کلونو ترمنځ
وو، پرون د چهارشنبې په ورځ د زمري په ۱۴مه، مازیګر شاوخوا ۴:۳۰ بجې د دایکندي
مرکز نیلي ښار اړوند د جوزک کلي په سیمه کې په یاد سیند کې د لمبېدو پر مهال اوبو
ډوب کړي دي.
سرچینه زیاتوي چې د دغو ځوانانو د موندلو لپاره شاوخوا دوه نیم ساعته
پلټنې وشوې او وروسته یې جسدونه وموندل شول او خپلو کورنیو ته وسپارل شول.
په افغانستان کې د اوړي په موسم کې د سیندونو، بندونو او نورو اوبو کې
د لمبېدو پر مهال د خلکو د ډوبېدو پېښې تکرارېږي. د اوبو د ژوروالي، د لامبو وهلو
د مهارتونو د نشتوالي او د خوندیتوب د لازم تدابیرو نه مراعاتول د دغو پېښو له
مهمو لاملونو څخه ګڼل کېږي.
