د طالبانو د اوبو او انرژۍ وزارت وايي، له جاپانۍ «پي.اېم.اېس» موسسې سره یې د ۲ میلیونه امریکايي ډالرو په ارزښت د اوبو د یو شمېر پروژو د پلي کولو تړون لاسلیک کړی دی.
دغه وزارت د زمري په ۱۳مه، ۱۴۰۵، سهشنبه ویلي چې تړون د اوبو او
انرژۍ وزارت د وزیر ملا محمد یونس اخندزاده او د یادې موسسې د استازي ترمنځ لاسلیک
شوی دی.
د تړون له مخې، «پي.اېم.اېس» موسسه به د راتلونکو دوو کلونو په موده
کې د ننګرهار په سپین غر ولسوالۍ کې د اوبو د مدیریت او تمویل اړوند پروژې پلي کړي.
د وزارت په وینا، په دې پروژو کې د ۱۰
چکډېمونو، درې حوضونو، درې سربندونو او درې کانالونو جوړول شامل دي.
دغه موسسه به د یوه کاریز د بیارغونې چارې هم ترسره کړي.
د سرچینې په خبره، د پروژو د پلي کېدو پر مهال به سلګونو کسانو ته د
کار زمینه برابره شي او له بشپړېدو وروسته به شاوخوا ۳۰۵
هکټاره کرنیزه ځمکه د اوبو لګولو له اسانتیاوو برخمنه شي.
شالید: د افغانستان په ډېرو
سیمو کې د اوبو کمښت او د اوبو لګولو د زیربناوو محدودیت د کرنې پر فعالیتونو اغېز
کوي. د چکډېمونو، کانالونو، سربندونو او کاریزونو جوړول او بیارغول د اوبو د
زېرمه کولو او مدیریت ترڅنګ، د کرنیزو ځمکو د خړوبولو او د کلیوالو د معیشت په
پیاوړتیا کې مهم رول لري.
