قازینفورم خبري اژانس راپور ورکړی چې تاجکستان، ایران او افغانستان د یوه ګډ ترانسپورتي دهلېز د جوړولو هوکړه کړې، چې له لارې به یې د افغانستان له لارې د تاجکستان او ایران ترمنځ د سوداګریزو توکو لېږد اسانه شي.
د تاجکستان د ترانسپورټ وزارت په وینا، دغه هوکړه د چنګاښ په ۲۵مه، ۱۴۰۵ په ایران کې د مشهد ښار په کوربتوب د درې واړو هېوادونو د استازو ترمنځ تر ناستې وروسته لاسلیک شوې ده.
ټاکل شوې چې د دې دهلېز لومړنۍ ازمایښتي باروړنه د وږي په میاشت کې ترسره شي. د دې باروړنې موخه د سرحدي، ګمرکي او ترانسپورتي پروسیجرونو د اغېزمنتیا، او همداراز د اړوندو ادارو ترمنځ د همغږۍ ارزونه ده.
د پروژې د عملي کېدو د څار لپاره د درې واړو هېوادونو دایمي ګډه کاري ډله هم جوړه شوې ده. دغه ډله به احتمالي ستونزې څېړي، د هوکړو د عملي کېدو څارنه کوي او د دې لارې د لا پراختیا لپاره وړاندیزونه چمتو کوي.
د راپور له مخې، دغه سړکیز ترانسپورتي دهلېز ښايي په راتلونکي کې د منځنۍ اسیا نورو هېوادونو او چین ته هم وغځول شي.
تر دې مخکې تاجکستان او ترکمنستان د اوسپنېپټلۍ له لارې د بار وړلو د کچې پر زیاتولو او د باثباته تعرفوي پالیسۍ پر جوړولو هم خبرې کړې وې.
