د نورستان د طالبانو د والي ویاند فریدون صمیم وايي، د دغه ولایت په مرکز پارون ښار کې د وروستیو سېلابونو له امله د لادرکو کسانو له ډلې د دوو نورو کسانو جسدونه موندل شوي دي، چې ورسره په دغو سېلابونو کې د وژل شویو کسانو شمېر ۲۴ تنو ته رسېدلی دی.
صمیم وايي، دغه دوه کسان د شنبې په ورځ، د ۱۴۰۵
کال د زمري په ۱۰مه، د ژغورنې عملیاتو په ۱۳مه ورځ وموندل شول چې
دواړه نارینه دي.
دغه سېلابونه د ۱۴۰۵ کال د
چنګاښ په ۲۹مه د نورستان ولایت په مرکز پارون کې راغلي وو چې د مرګژوبلې ترڅنګ یې
دغه ولایت ته د شاوخوا ۳۵ میلیونه
ډالرو په ارزښت مالي زیانونه اړولي دي.
د سېلابونو له امله د رامنځته
شوې مرګژوبلې او مالي زیانونو کچه په داسې حال کې لوړیږي، چې نورستان د
غرنیو سیمو له امله د طبیعي افتونو، په ځانګړي ډول د سېلابونو او ځمکې ښویېدنې، له
خطر سره مخ ولایتونو څخه ګڼل کېږي.
