رویټرز راپور ورکړی چې د امریکا وروستیو بریدونو پر ایران نه یوازې د هرمز تنګي د خوندیتوب موخه لرله، بلکې د ایران مهم پوځي تاسیسات یې هم په نښه کړي، چې د امریکا د ولسمشر ډونالډ ټرمپ لپاره یې د راتلونکو احتمالي پوځي عملیاتو انتخابونه پراخ کړي دي.
د رویټرز په وینا، درېیو امریکایي چارواکو، چې د پوځي پلانونو د حساسیت له امله یې د نوم نه ښودلو په شرط خبرې کړې، ویلي چې دغو بریدونو د ایران د هوايي دفاع سیستمونه، ساحلي رادارونه، د توغندیو او بېپیلوټه الوتکو مرکزونه او ځینې سمندري پوځي وسایل زیانمن کړي دي. د دوی په خبره، دغه تاسیسات د پراخو امریکایي پوځي عملیاتو پر وړاندې خنډ بلل کېدل.
یوه چارواکي دغه بریدونه د «چمتووالي عملیات» بللي او ویلي یې دي چې موخه یې د هر ډول پراخ پوځي کمپاین تر پیل مخکې د ایران د دفاعي وړتیاوو کمزوري کول دي.
راپور زیاتوي چې ډونالډ ټرمپ تر اوسه د ایران پر وړاندې د خپلو راتلونکو ګامونو په اړه په ښکاره څه نه دي ویلي، که څه هم نوموړي تېره اوونۍ کانګرس ته د ایران سره د نوي پوځي کړکېچ په اړه رسمي خبر ورکړی و. له همدې امله لا هم څرګنده نه ده چې واشنګټن غواړي خپل پوځي عملیات نور هم پراخ کړي که نه.
د رویټرز په وینا، دا جګړه اوس خپلې پنځمې میاشتې ته داخله شوې ده. راپور وايي، که څه هم د امریکا او اسرائیل عملیاتو د ۱۴۰۵ کال د کب له ۹مې راهیسې د ایران دودیزې پوځي وړتیاوې کمزورې کړې دي، خو ایران لا هم د توغندیو او بېپیلوټه الوتکو د پام وړ وړتیا لري او د سوداګریزو تېللېږدوونکو بېړیو او د خلیج د هېوادونو پر وړاندې یې بریدونه کړي دي.
رویټرز د امریکا د دفاع وزارت له قوله ویلي چې وروستي بریدونه د ایران د هوايي دفاع سیستمونو، ساحلي رادارونو، د توغندیو او بېپیلوټه الوتکو د مرکزونو، وړو کښتیو او نورو سمندري وسایلو پر ضد ترسره شوي دي.
راپور یادونه کوي چې رویټرز د ۱۴۰۵ کال د وري په میاشت کې هم خبر ورکړی و چې امریکایي پوځي پلان جوړونکو د هرمز تنګي د خوندیتوب لپاره د ایران ساحلي سیمو ته د امریکایي ځواکونو د استولو بېلابېل انتخابونه ارزولي وو. په دغو بحثونو کې د Kharg Island د نیولو احتمال هم شامل و؛ هغه ټاپو چې د ایران ډېری د تېلو صادرات ترې ترسره کېږي، خو چارواکو منلې وه چې دا ډول عملیات به له لوړو پوځي خطرونو سره مل وي.
ډونالډ ټرمپ د سېشنبې په ورځ ویلي چې مخکې یې امریکایي پوځ ته لارښوونه کړې وه څو د Kharg Island ته نږدې عملیاتو کې د ایران د تېلو تاسیسات په نښه نه کړي، خو زیاته کړې یې ده چې که اړتیا پېښه شي، د دغې ټاپو د نیولو احتمال یې نه دی رد کړی.
رویټرز دا هم ویلي چې ټرمپ د Pickaxe Mountain په نوم د هغه کلک ساتل شوي ځمکني مرکز د په نښه کولو ګواښ هم کړی چې د ایران له اټومي پروګرام سره تړاو لري.
د Center for Strategic and International Studies پوځي شنونکي Mark Cancian رویټرز ته ویلي، د احتمالي پوځي اهدافو په اړه ښکاره څرګندونې کولای شي د خبرو اترو پر مهال پر ایران فشار زیات کړي، خو په ورته وخت کې د امریکا ستراتیژیکې موخې هم افشا کولای شي.
د رویټرز په وینا، د ټرمپ د ایران تګلارې منتقدین وايي، که څه هم پوځي عملیاتو د ایران دودیزو وسلهوالو ځواکونو او دفاعي صنعت ته زیان اړولی او ځینې تاکتیکي بریاوې یې لرلې، خو واشنګټن لا هم نه دی توانېدلی چې له تهران څخه ستراتیژیک امتیازات ترلاسه کړي. هغوی خبرداری ورکوي چې ایران لا هم د بېپیلوټه الوتکو، راکټونو او نورو نامتقارنو وسلو په کارولو سره د هرمز تنګي له لارې نړیواله سوداګري ګواښلای شي.
راپور زیاتوي چې روانې جګړې د ټرمپ په اداره کې د پوځي عملیاتو د پراخولو په اړه بحثونه هم زیات کړي دي. د یوه امریکایي چارواکي په وینا، د امریکا د دفاع وزیر Pete Hegseth د ایران پر وړاندې د پراخ پوځي کمپاین ملاتړ کړی دی.
د امریکا د دفاع وزارت پخواني چارواکي او د Atlantic Council اوسني غړي Imran Bayoumi رویټرز ته ویلي، د ټرمپ وروستۍ عامه څرګندونې ښايي د خبرو اترو پر مهال پر تهران د فشار د زیاتولو او د ایران د مشرانو د نامعلوم وضعیت د ساتلو لپاره وي، خو ټینګار یې کړی چې د ټرمپ علني څرګندونې باید د هغه د ملي امنیت د ټیم له داخلي پالیسۍ او بحثونو څخه جلا وکتل شي.
