د امریکا ولسمشر ډونالډ ټرمپ ویلي چې ښايي امریکا او ایران د روانې اوونۍ تر پایه د دواړو هېوادونو ترمنځ د درې میاشتنۍ جګړې د پای ته رسولو لپاره یوه هوکړه لاسلیک کړي، خو ایراني چارواکو ټینګار کړی چې لا هم وروستۍ پرېکړه نه ده شوې.
ټرمپ د پنجشنبې په ورځ په سپینه ماڼۍ کې خبریالانو ته وویل چې واشنګټن د ایران سره د جګړې د پای ته رسولو لپاره یوې «سترې هوکړې» ته رسېدلی دی.
هغه زیاته کړه چې د دې هوکړې په لاسلیک سره به د هرمز تنګی یو ځل بیا د کښتۍ چلونې پر مخ پرانیستل شي او ښايي دا تړون په راتلونکو ورځو کې په اروپا کې لاسلیک شي.
بلخوا، د ایران د بهرنیو چارو وزارت ویاند اسماعیل بقایي ویلي چې که څه هم د هوکړې ډېری برخې نهایي شوې دي، خو تهران لا هم وروستۍ پرېکړې ته نه دی رسېدلی.
د هغه په وینا، دا موضوع د ایران د پرېکړهکوونکو بنسټونو تر ارزونې لاندې ده او ایران به له خپلو سره کرښو څخه تېر نه شي.
ټرمپ همداراز ادعا کړې چې دا احتمالي هوکړه د سیمې د هېوادونو، لکه اسرائیل، سعودي عربستان، قطر او متحده عربي اماراتو له ملاتړ څخه برخمنه ده. خو د اسرائیلو د لومړي وزیر بنیامین نتانیاهو دفتر ویلي چې دغه هېواد د دې تفاهمنامې برخه نه دی.
د امریکا ولسمشر یو ځل بیا ټینګار کړی چې هر ډول هوکړه باید د ایران د اټومي وسلو ترلاسه کولو مخه ونیسي؛ هغه ادعا چې تهران تل رد کړې ده.
دا پرمختګونه داسې مهال رامنځته کېږي چې، سره له دې چې د دواړو لورو ترمنځ یو نازک اوربند ټینګ شوی، خو په وروستیو ورځو کې نښتې لا هم دوام لري.
په سیمه کې د ایران او امریکا متقابلو بریدونو او د هرمز تنګي شاوخوا تاوتریخوالي د انرژۍ د خوندیتوب او د سیمې د ثبات په اړه اندېښنې زیاتې کړې دي.
د راپورونو له مخې، ایران په خبرو کې د نړیوالو بندیزونو د لغوه کېدو، د کنګل شویو شتمنیو د ازادېدو او پر هرمز تنګي د خپل کنټرول د رسمیت پېژندنې غوښتنه کړې ده.
د ایران او امریکا ترمنځ جګړه چې د فبرورۍ له وروستیو څخه پیل شوې، تر اوسه زرګونه کسان پکې وژل شوي او د نړیوالو انرژۍ بازارونو او اقتصاد یې پراخ اغېزمن کړي دي.
