د مالدیف د څلور اړخیزو سیالیو په پایلوبه کې، ټاکل شوې نن چهارشنبه د افغانستان د فوټبال ملي لوبډله د پاکستان پر وړاندې میدان ته ووځي.
په همدې حال کې د افغانستان د فوټبال فدراسیون ویلي چې د یادې پایلوبې
په درشل کې د ملي لوبډلې یو شمېر لوبغاړو تمریناتي کمپ پرېښی دی.
فدراسیون نن چهارشنبه په یوه خبرپاڼه کې ویلي چې جمشید اچکزی او حبیبالله
عسکر د سویډن کې د کاري ستونزو او د خپلې دندې د له لاسه ورکولو د اندېښنې له امله
د پایلوبې وړاندې کمپ پرېښی دی.
د افغانستان د فوټبال فدراسیون همداراز ویلي چې د ملي لوبډلې کپتان،
امید پوپلزی، چې د تېرې لوبې د سره کارت له امله له پایلوبې محروم و، له لوبډلې
سره پاتې نه شو او کمپ یې پرېښود.
له بلې خوا، رحمت اکبري هم د تخنیکي کادر له همغږۍ پرته د سفر ټکټ
برابر کړی او تېره شپه یې په مالدیف کې د ملي لوبډلې کمپ پرېښی دی.
دا په داسې حال کې ده چې د افغانستان د فوټبال ملي لوبډله نن شپه د
ځایي وخت له مخې په ۸:۳۰ بجو د پایلوبې په حساسه لوبه کې د پاکستان پر وړاندې
میدان ته ځي؛ هغه سیالي چې د مینهوالو لپاره ځانګړی اهمیت لري.
د افغانستان د فوټبال فدراسیون له هغو لوبغاړو مننه کړې چې له لوبډلې
سره پاتې دي او له مینهوالو یې غوښتي چې د خپلو دعاوو او ملاتړ له لارې د هېواد د
ملي لوبډلې ملاتړ وکړي.
