د هندي سینما د موسیقۍ نامتو او افسانوي سندرغاړې آشا بوسلې په ۹۲ کلنۍ کې مړه شوه.
د کورنۍ په وینا، نوموړې په ممبۍ کې له زړه د حملې وروسته روغتون ته
وړل شوې وه، خو هلته یې ساه ورکړې.
د بي بي سي د راپور له مخې آشا بوسلې د بالیووډ د پلیبیک سندرې (playback singing) له تر ټولو لویو او اغېزمنو غږونو څخه ګڼل
کېده، چې هنري سفر یې له اتو لسیزو زیات دوام وکړ او په دې موده کې یې له ۱۲ زرو
څخه زیاتې سندرې ویلي دي.
د هغې ځانګړی غږ د هندي فلمونو بېشمېره سندرو ته ژوند ورکړی و، چې د
فلمونو اداکارانو به د هغې پر غږ لبحرکي کوله.
د هندي سینما په موسیقۍ کې د هغې پراخ حضور دومره اغېزمن و، چې حتی د
بریتانوي موسیقارانو په اثار کې هم یاد شوې ده؛ د بېلګې په توګه د برتانوي ډلې
کورنر شاپ مشهور اثر «Brimful of Asha» د هغې په
نوم جوړ شوی و.
هغې له نړیوالو هنرمندانو سره هم ګډ کار کړی، چې په کې د برتانوي
هنرمند بوي جورج او د ریم غړی مایکل سټایپ هم شامل دي.
د هند لومړي وزیر نریندرا مودي د هغې مړینه د هند د موسیقۍ لپاره ستره
ضایعه بللې او ویلي یې دي چې د هغې هنري سفر د هېواد کلتوري میراث ته ځانګړی ارزښت
ورکړی دی.
د بالیووډ هنرمندې هېما مالیني هم ویلي، چې د آشا بوسلې له مړینې سخت
خواشینې ده او د هغې غږ یې د بېشمېره فلمي سندرو برخه ګرځولې وه.
موسیقار شانکر مهداوان ویلي، چې د هغې مړینه د ټول هند لپاره یوه درنه
غمیزه ده او د هغې غږ به تل ژوندی پاتې وي.
آشا بوسلې د خپل اوږد هنري ژوند په ترڅ کې له بېلابېلو موسیقۍ جوړونکو
سره کار کړی، چې په کې ر.ډ. برمن او او.پي. نایر شامل دي، او د بالیووډ د موسیقۍ
په بڼه کې یې نوې رنګیني او بدلون راوستی و.
هغې د خپل ژوند په وروستیو کلونو کې هم هنري فعالیتونه نه وو پرېښي او
تر ۲۰۲۳ پورې یې په ژوندیو کنسرتونو او ډیجیټل پروژو کې برخه اخیسته.
د هغې د مړینې له اعلان وروسته په ټولنیزو رسنیو کې د خواخوږۍ او ستاینې
پراخ غبرګونونه خپاره شوي دي، او ډېری خلک یې د هندي موسیقۍ د یوه دور پای بللی دی.
