هغه همداراز د نمنګان ولایت د صنعتي او تولیدي وړتیاوو او د ځایي سوداګرو د فعالیتونو په اړه معلومات وړاندې کړل.
په دې خبرو کې د درملو تولید، د چرګانو فارمونو پراختیا، د ګرانبیه او نیمه ګرانبیه ډبرو په برخه کې ګډې پانګونې او د هغو صادرات، همدارنګه د کرنیزو ماشینونو او د څاڅکي اوبو لګولو سیسټمونو په برخه کې همکاري د بحث مهم ټکي وو.
عزیزي یو ځل بیا له اوزبیکستان سره د ګډو همکاریو لپاره د افغانستان چمتووالی څرګند کړ او د سړو خونو، کرنیزو او درملیزو محصولاتو د فابریکو په برخه کې یې د پانګونې فرصتونو ته نغوته وکړه. هغه ټینګار وکړ، چې د افغانستان خصوصي سکټور چمتو دی چې د اوزبیکستان له بېلابېلو ولایتونو سره همکاري وکړي.
غونډه په دې پرېکړه پای ته ورسېده، چې د افغانستان د خصوصي سکټور یو پلاوی به اوزبیکستان ته سفر وکړي څو سوداګریز فرصتونه وڅېړي.
سربېره پر دې، عبدالرزاقوف د صنعت او سوداګرۍ وزارت مشرتابه ته بلنه ورکړه، چې د نمنګان ولایت د ګلونو په کلني فېسټیوال کې ګډون وکړي، چې هر کال د مۍ په میاشت کې جوړېږي، او عزیزي دا بلنه ومنله.
