د طالبانو د عامې روغتیا وزارت وايي، د دې وزارت د درملو او روغتیايي محصولاتو د تنظیم عمومي رییس نعیمالله ایوبي د بنګلهدېش د درملو د صنعت اتحادیې له عمومي منشي محمد ذاکر حسین او مل پلاوي سره لیدنه کړې ده.
د وزارت په وینا، په دې ناسته کې د درملو د تولید، تنظیم، سوداګرۍ او
پانګونې په اړه خبرې شوي او ټینګار شوی، چې د درملو سوداګري باید په قانوني، منظم
او شفاف ډول ترسره شي او د درملو د ثبت او ارزونې بهیر چټک شي.
سرچینه زیاتوي، افغان پلاوي د بنګلهدېش د درملو تولیدي شرکتونو
مسؤلین هڅولي، چې په افغانستان کې د درملو د تولید په برخه کې پانګونه وکړي او
همدارنګه افغانستان ته د باکیفیته درملو پر صادراتو بحث شوی دی.
د وزارت په وینا، افغان پلاوي وړاندیز کړی، چې افغانستان ته
صادرېدونکي درمل دې په افغانیو د بیو لېبل ولري او هغه درمل چې د استعمال نېټه یې
کمه پاتې وي، دې نه صادرېږي. همدارنګه، د دواړو هېوادونو ترمنځ د بانکي اسانتیاوو
پر برابرېدو هم خبرې شوې دي.
د طالبانو د عامې روغتیا وزارت وايي، د بنګلهدېش د درملو د صنعت
اتحادیې مسؤلینو ژمنه کړې، چې افغانستان ته به درمل په مناسب قیمت صادر کړي او د
کابل او ډاکې ترمنځ د کارګو الوتنو پر پیل یې ټینګار کړی دی.
