د پاکستان له لوري د انګورو اډې بندر برانستل شو

پاکستاني رسنیو راپور ورکړی، چې افغانستان او پاکستان ترمنځ د «انګور اډې» بندر له دوه کلن ځنډ څخه وروسته په رسمی ډول پرانستل شوی دی.

په راپور کې ویل شوي،‌ چې ددې لارې پرانستل به د تورخم پر لارې فشار کم کړي، چې اوس مهال زیاته ګڼه ګوڼه لري.

د راپور په اساس، شنونکي وايي چې د پاکستان له لوري د انګورو اډې پرانستل، له افغانستان سره د قانوني سوداګرۍ د پیاوړي کولو لیواتیا ښايي؛ هغه هېواد چې له پرله پسې سرحدی ترینګلتیاوو سربېره، لا هم د پاکستان لپاره یو له سترو صادراتی بازارونو څخه دی.

د رسمي شمېرو له مخې، د دواړو هېوادونو ترمنځ اوسني تجارت کچه په کال کې شاوخوا ۸۰۰ تر ۹۰۰ میلیونه ډالرو پورې ده. خو تجاران وايي چې د اسانتیاوو له راوستلو او د کارونو له ساده کولو سره به دغه شمېرې له ۳ تر ۴ میلیونو پورې لوړې شي.

د جنوبی وزیرستان د سوداګرۍ او صنایعو د خونې رییس، سیف الرحمن ویلي چې ددې بندر بیاځلې پرانیستل د سوداګرۍ او کاري فرصتونو د بیا احیا لپاره یو مهم ګام دی.

هغه زیاته کړې: « د بندر د تړل کېدو مخکې، هره ورځ تر ۳۰۰ پورې بابرۍ موترې تېرېدلې. اوس د ملی لوژستیک ادارې (NLC) له لورې د نویو تاسیساتو له جوړېدو سره تمه ده، چې د سوداګرۍ کچه لوړه شي».

د جنوبی وزیرستان د سوداګرۍ خونې رییس دا هم ویلي، چې د ګمرکي چارو او مهاجرتی تاسیساتو جوړولو له پیل سره شاوخوا ۵۰ ځايي اوسېدونکي په کار بوخت شوي او نږدې ۱۰ زره کاریګران په مستقیم او غیر مستقیم ډول د کرښې دواړو خواوو ته په سوداګرۍ بوخت دي.

هغه زیاته کړه: « ددې لارې د بشپړ پرانیستو سره به د تورخم پر پندر فشار کم شي، او افغان مسافر او ناروغان به په یوه ورځ کې اسلام آباد، لاهور یا ملتان ته د درملنې لپاره لېږل کېږي.».

د هغه په وینا، افغانستان له دې لارې ډېرې تازه او وچې مېوې، او سبزیجات صادروي،‌ او په ورته وخت کې د پاکستان له لورې بریښنایي او الکترونیکی وسایل، ټوکرې، درمل او خوراکی توکي افغانستان ته صادرېږي.

هغه له طالبانو غوښتي، چې خپل سرحدی تاسیسات دې ښه کړي: « د افغانستان دولت باید د پاکستان په څېر اقدامات وکړي. او اسانتیاوې دې رامنځته کړي، ترڅو سوداګر د انګورو اډې بندر کې فعالیت ته وهڅېږي».

له بلې خوا تر اوسه طالبانو ددې بندر پرانسته تایید او یا هم رد کړې نه ده.

دغه بندر د برمل په غرنۍ دره کې پروت دی،‌ چې د پاکستان د خبر پښتونخوا ایالت جنوبی وزیرستان له ولسوالۍ سره د پکتیا ولایت نښلوي. دا لار په ۲۰۲۳  زېږدیز کال کې د امنیتي ستونزو له امله د پاکستان له لورې تړل شوې وه.