د امریکا ولسمشر ډونالډ ټرمپ د افغانستان څخه د امریکايي ځواکونو د وتلو پر څرنګوالي یو ځل بیا نیوکه کړې او ادعا یې کړې چې د پخواني ولسمشر جو بایډن د ادارې «ناسم مدیریت» طالبانو ته زمینه برابره کړه چې له بګرام زندان څخه زرګونه «ترهګر» خوشې کړي.
ټرمپ دا څرګندونې د ۲۰۲۱ کال د اګست پر ۲۶مه د کابل هوايي ډګر په برید
کې د ۱۳ وژل شویو امریکايي سرتېرو د کلیزې په مناسبت په یوه خپره کړې اعلامیه کې
کړې دي.
د امریکا ولسمشر د بایډن د ادارې له خوا د ځواکونو د وتلو بهیر
«ناورینبار» بللی او ویلي یې دي چې دغه بهیر د ده په وینا، امریکايي ځواکونه بېدفاع
کړل او طالبانو ته یې د خطرناکو بندیانو د خوشې کولو فرصت برابر کړ.
ټرمپ ادعا کړې چې په بګرام کې له زندانه خوشې شویو بندیانو کې زرګونه
«ترهګر او خونخواره مجرمین» شامل وو.
هغه همداراز ویلي چې د کابل هوايي ډګر برید د بایډن او د ډیموکراتانو
د «مطلقې بېکفایتۍ» پایله وه.
ټرمپ د برید د قربانیانو له کورنیو سره خپلو لیدنو ته په اشاره ویلي
چې د ده په وینا، د ډیموکرات ګوند دغو کورنیو ته کافي پاملرنه نه ده کړې. نوموړي
زیاته کړې چې د سپینې ماڼۍ ته له بېرته ستنېدو وروسته یې خپله ژمنه عملي کړې او د
برید اصلي طراح یې نیولی دی.
د ۲۰۲۱ کال د اګست پر ۲۶مه د کابل هوايي ډګر په ځانمرګي برید کې د ۱۳
امریکايي سرتېرو په ګډون له ۱۶۰ ډېر افغانان ووژل شول. د داعش خراسان څانګې د دغه
برید مسوولیت ومانه.
هغه مهال زرګونه افغانان او بهرني وګړي هڅه کوله چې د طالبانو له بیا
واکمنېدو وروسته د امریکا په مشرۍ د بېړنۍ تخلیې له لارې له افغانستان څخه ووځي.
بګرام هوايي اډه، چې د کلونو لپاره په افغانستان کې د امریکا د پوځي
او استخباراتي عملیاتو مهم مرکز و، د کابل له سقوط څو اوونۍ مخکې د امریکايي
ځواکونو له خوا پرېښودل شوه.
د طالبانو له خوا د بګرام له نیولو وروسته د زندان دروازې پرانیستل
شوې او ګڼ شمېر بندیان خوشې شول. د دغو بندیانو په اړه د طالبانو، القاعده او داعش
د غړیتوب ادعاوې شوې وې.
له افغانستان څخه د امریکايي ځواکونو د وتلو بهیر لا هم د امریکا په
سیاسي بحثونو کې د اختلاف یوه مهمه موضوع ده. د دې بهیر منتقدان وايي چې وتل بېړني
او له کافي امنیتي پلان پرته ترسره شول، خو پلویان یې وايي چې د ۲۰ کلنې جګړې پای
ته رسول اړین وو او په افغانستان کې د امریکايي ځواکونو د حضور دوام به د لا زیاتو
مالي او انساني تلفاتو سبب شوی وای.
