کابل ټریبیون — د بشري حقونو د څار سازمان وايي، په افغانستان کې د طالبانو له لوري پر ښځو او نجونو لګېدلي محدودیتونه په پرلهپسې توګه سخت شوي او دې ډلې د زدهکړو، کار، تګ راتګ او ټولنیز ژوند په برخو کې د پراخو بندیزونو له لارې د جنسیت پر بنسټ د تبعیض او ځپنې یو سیسټم رامنځته کړی دی.
دغه سازمان په خپل یوه تحلیلي راپور کې چې د ۲۰۲۶ کال د اګست په میاشت کې خپور شوی، ویلي چې له شپږم ټولګي پورته انجونې له زدهکړو بېبرخې دي، په داسې حال کې چې ښځې له ګڼو دندو او ټولنیزو فعالیتونو څخه منع شوې دي.
د بشري حقونو د څار سازمان په وینا، ښځې په ډېرو مواردو کې له کوره د وتلو لپاره د یوه نارینه محرم ملګرتیا ته اړتیا لري او روغتیايي خدمتونو ته یې لاسرسی هم له محدودیتونو سره مخ دی.
په راپور کې ویل شوي چې طالبانو د ښځینه وو د ښکلا سالونونه او د کورني تاوتریخوالي د قربانیانو د ملاتړ لپاره د خوندي پناه ځایونه تړلي دي. ښځې او نجونې له ورزشي فعالیتونو، ورزشي مرکزونو او پارکونو ته له تګ څخه هم منع شوې دي.
د ښځو اعتراضونه او پټ ښوونځي
د بشري حقونو د څار سازمان وايي، یو شمېر افغان ښځو د طالبانو د محدودیتونو پر وړاندې د اعتراضونو او د نجونو لپاره د پټو ښوونځیو د جوړولو له لارې مقاومت کړی، خو له نیول کېدو، شکنجې او زنداني کېدو سره مخ شوې دي.
دغه سازمان خبرداری ورکړی چې د افغانستان اوسنی وضعیت ښيي، د بشري حقونو لاسته راوړنې په لنډ وخت کې له منځه تللی شي.
د راپور د لیکوالانو په باور، نړیوالې ټولنې د افغان ښځو د وضعیت په اړه د اندېښنو له څرګندولو سره سره، تر اوسه د طالبانو د سیاستونو د بدلون لپاره کافي او اغېزمن اقدامات نه دي کړي.
د بشري حقونو د څار سازمان له نړیوالې ټولنې غوښتي چې د ډیپلوماتیکو لیدنو له لارې د طالبانو د چلند د بدلون پر هڅو بسنه ونه کړي، بلکې دغه ډله د بشري حقونو د سرغړونو په تړاو ځوابویونکې کړي.
