د طالبانو تر ادارې لاندې د افغانستان بانک وايي، سوداګریز بانکونه د یوې طرحې له مخې د هرات ـ مزارشریف د ۶۵۷ کیلومتره اوسپنیزې پټلۍ پر جوړولو شاوخوا ۵۵ میلیارده افغانۍ پانګونه کوي.
یاد بانک د یکشنبې په ورځ، د ۱۴۰۵
کال د زمري په ۱۱مه، په یوه خبرپاڼه کې ویلي، چې دغه پانګونه د تېر ۱۴۴۷ سپوږمیز کال له مهمو موضوعاتو څخه وه او د افغانستان بانک، مالیې
وزارت او د طالبانو د اقتصادي مرستیالۍ د یوه ګډ میکانیزم له مخې به د سوداګریزو
بانکونو په مشارکت ترسره شي.
د سرچینې په وینا، د دغه میکانیزم له بشپړېدو سره به د یادې پانګونې د
عملي کېدو زمینه برابره شي.
د هرات ـ مزارشریف اوسپنیزه پټلۍ له هرات څخه پیلېږي او تر مزارشریف
پورې غځېږي. د افغانستان بانک په وینا، دغه پروژه نه یوازې د افغانستان لپاره د
یوه مهم اقتصادي دهلېز ارزښت لري، بلکې د افغانستان له لارې ایران او ترکیه هم د
منځنۍ اسیا له هېوادونو او چین سره نښلوي.
د هرات ـ مزارشریف اوسپنیزې پټلۍ پروژه د افغانستان د شمال او لوېدیځ
ترمنځ د سوداګریزو او ترانزیټي اړیکو د پراختیا لپاره له مهمو طرحو څخه ګڼل کېږي.
د دې پټلۍ په جوړېدو سره به د هېواد له لوېدیځو سیمو څخه د شمال پر لور د توکو د
لېږد زمینه اسانه شي او افغانستان به د سیمې له اوسپنیزو او سوداګریزو دهلېزونو
سره لا ډېر ونښلول شي.
