د طالبانو د رئیس الوزرا د دفتر عمومي رئیس عبدالواسع د ازبکستان د لومړي وزیر د مرستیال جمشید خواجه یوف په مشرۍ راغلي پلاوي ته هرکلی ویلی دی.
د طالبانو د مرستیال ویاند حمدالله فطرت ویلي، ملا عبدالواسع نن
(یکشنبه) سهار وختي د ازبکستان پلاوي ته هرکلی ووایه.
د فطرت په وینا، دغه پلاوی به د طالبانو د رئیس الوزرا له اقتصادي
مرستیال ملا عبدالغني برادر اخند، د کانونو او پټرولیم له وزیر ملا هدایت الله
بدري، د کرنې له وزیر عطاءالله
عمري او د ټولګټو چارو له وزیر ملا محمد عیسی ثاني سره د سیاسي، اقتصادي،
سوداګریزو، پانګونې او ټرانزیټي همکاریو د پراختیا په اړه خبرې وکړي.
نوموړی پلاوی تېره ورځ کابل ته رسېدلی، چې د ازبکستان د خصوصي سکټور
استازي هم ورسره مل دي. ټاکل شوې دواړه لوري د افغان ـ ازبک سوداګریز کنفرانس هم
جوړ کړي.
افغانستان او ازبکستان په وروستیو کلونو کې د سوداګرۍ، ټرانزیټ، انرژۍ
او پانګونې په برخو کې د همکاریو د پراختیا لپاره پر بېلابېلو پروژو خبرې کړې دي.
د دواړو هېوادونو ترمنځ د رېل پټلۍ، سوداګریزو دهلېزونو او سیمهییز اتصال موضوعات
د همکاریو له مهمو برخو څخه بلل کېږي.
