د رویټرز د راپور له مخې، متحده عربي امارات د ټولنیزو رسنیو د کارونې لپاره د عمر لږ تر لږه حد ۱۵ کاله ټاکلی، او په دې توګه لومړنی عربي هېواد ګرځېدلی چې دا ډول محدودیت لګوي، په داسې حال کې چې په نړۍ کې د ماشومانو پر وړاندې د انلاین پلاتفورمونو د اغېزو په اړه اندېښنې زیاتې شوې دي.
د پنجشنبې په ورځ د تصویب شوې پرېکړې له مخې، له ۱۵ کلونو څخه کم عمره ماشومان به د شخصي ټولنیزو رسنیو حسابونه جوړولو، کارولو یا اداره کولو څخه منع شي. د حکومت د رسنیو دفتر په وینا، دا محدودیتونه د محتوا خپرولو، تبصره کولو، شریکولو او عامه ډلو سره د یوځای کېدو برخه هم رانغاړي.
د ۱۵ او ۱۶ کلونو ترمنځ تنکیو ځوانانو ته به اجازه ورکړل شي چې د سختو تدابیرو تر څار لاندې ټولنیزې رسنۍ وکاروي، چې پکې د عمر مطابق د محتوا کنټرول، له ناپېژندل شوو کاروونکو سره د اړیکو محدودول، د سکرین د وخت مدیریت او د والدینو د څار ځانګړنې شاملې دي.
نوې مقررات په اماراتو کې پر ټولو فعالو ټولنیزو رسنیو پلاتفورمونو تطبیقېږي او شرکتونه اړ کوي چې د عمر د تایید قوي سیستمونه پلي کړي، چې پکې ډیجیټلي پېژندپاڼې او د مصنوعي ځیرکتیا پر بنسټ ټکنالوژۍ شاملې دي. د عمر د ځاناعلان شوې معلومات به د اعتبار وړ ونه ګڼل شي.
همدارنګه، پلاتفورمونه مکلف دي چې د ۱۵ کلونو څخه کم عمره ماشومانو حسابونه غیر فعال کړي، د کاروونکو له لوري د تاییدي سیستمونو د تېرېدلو مخه ونیسي او د ماشومانو شخصي معلومات د هدفمند اعلانونو یا چلندیز تحلیل لپاره ونه کاروي.
چارواکو ویلي چې دا ګامونه د هغو اندېښنو د حل لپاره اخیستل شوي چې د زیانمنو محتواوو، ناامنو انلاین اړیکو، زیاتې کارونې او د معلوماتو د محرمیت له خطرونو سره تړاو لري.
ټولنیزو رسنیو شرکتونو ته تر ۱۲ میاشتو پورې وخت ورکړل شوی څو له نویو مقرراتو سره ځان برابر کړي.
متحده عربي اماراتو ویلي چې دا چوکاټ د ماشومانو د انلاین خوندیتوب د پیاوړتیا لپاره له نړیوالو هڅو سره همغږی دی، په داسې حال کې چې استرالیا او یو شمېر اروپایي هېوادونه هم د ماشومانو د ټولنیزو رسنیو د کارونې محدودولو ته مخه کوي.
