د طالبانو د کانونو او پټرولیم وزارت د پالیسۍ او برنامو مرستیال، عبدالرحمن قانت د افغانستان او امریکا د سوداګرۍ د ګډې خونې له رییس جفري ګریګو سره په کتنه کې د کانونو په برخه کې د پانګونې او همکاریو پر پراختیا خبرې کړې دي.
د یاد وزارت د خبرپاڼې له مخې، په دې کتنه کې د یادې خونې رییس د
افغانستان د کانونو په برخه کې د پانګونې د جذب او پراختیا لپاره د همکاریو ډاډ
څرګند کړی دی.
بلخوا، د طالبانو د کانونو او پټرولیم وزارت د پالیسۍ او برنامو
مرستیال د دغه پلاوي له لېوالتیا هرکلی کړی او ډاډ یې ورکړی چې د هېواد د کانونو
په برخه کې د معتبرو شرکتونو د پانګونې د جلب لپاره به د کانونو د قانون او اړوندو
کړنلارو له مخې لازمې اسانتیاوې برابرې شي.
سرچینې زیاته کړې چې په دې کتنه کې د افغانستان د کانونو د استخراج
اړوند پر یو شمېر نورو مسایلو هم خبرې شوې دي.
د افغانستان او امریکا د سوداګرۍ د ګډې خونې رییس جفري ګریګو تر دې
مخکې هم د طالبانو له یو شمېر نورو چارواکو سره لیدلي او د بېلابېلو موضوعاتو په
اړه یې ورسره خبرې کړې وې.
د یادونې ده چې په وروستیو کې د افغانستان د کانونو په برخه کې د
بهرنیو پانګوالو لېوالتیا زیاته شوې ده.
