رویټرز راپور ورکړی چې ایران او امریکا یو ځل بیا له یو بل سره نښتې کړي دي.
دغه نښته د دواړو هېوادونو ترمنځ د اوربند له پیل وروسته تر ټولو جدي کړکېچ بلل شوی دی.
د راپور له مخې، ایران امریکا د اوربند په ماتولو تورنه کړې او ویلي یې دي چې امریکايي ځواکونو دوه بېړۍ او د ایران په خاوره کې څو سیمې په نښه کړې دي.
په مقابل کې، امریکا ویلي چې د دوی بریدونه د ایران د اقدامونو په ځواب کې ترسره شوي او د کړکېچ د زیاتولو نیت نه لري.
ایران هم اعلان کړی چې په ځواب کې یې د هرمز تنګي ته نږدې د امریکا پوځي بېړۍ په نښه کړې دي.
خو سنتکام ویلي چې امریکايي ځواکونو او تجهیزاتو ته هېڅ زیان نه دی اوښتی.
د امریکا ولسمشر ډونالډ ټرمپ ویلي چې اوربند لا هم پر ځای دی او له ایران سره خبرې دوام لري.
د دغو نښتو له امله، په نړیوالو بازارونو کې د تېلو بیې لوړې شوې دي.
