د چين دولتي اژانس شينهوا راپور ورکړی، چې د چين د بهرنيو چارو وزير وانګ يي د چهارشنبې په ورځ په بېجينګ کې له خپل ايراني سيال عباس عراقچي سره خبرې پيل کړې دي.
د عراقچي دغه يو ورځنی سفر داسې مهال ترسره کېږي، چې ټاکل شوې د امريکا د پخواني ولسمشر ډونالډ ټرمپ او د چين د ولسمشر شي جين پينګ ترمنځ غونډه د مې مياشتې په ۱۴ او ۱۵ نېټو په بېجينګ کې ترسره شي.
دا ليدنه د خليج په سيمه کې د زياتېدونکو تاوتريخوالو په ترڅ کې کېږي، چيرې چې په دې وروستيو کې د امريکا او ايران ترمنځ د هرمز تنګي د کنټرول پر سر، چې د نړيوالو تېلو د لېږد يو مهمه لاره ده، متقابل بريدونه شوي دي.
د روانې اوونۍ په پيل کې دغه وضعيت نور هم کړکېچن شو، ځکه دواړو لورو سمندري مخامخ ټکرونه وکړل چې يو نازک اوربند يې له ګواښ سره مخ کړ. وروسته ټرمپ وويل چې د امريکا سمندري ځواک به له سوداګريزو بېړيو سره د تنګي د تېرېدو په برخه کې مرسته وکړي، خو دا عمليات وروسته له هغې ودرول شول چې نوموړي له ايران سره د يو پراخ هوکړې په اړه د «لوی پرمختګ» خبر ورکړ.
تر اوسه تهران د دغو وروستيو پرمختګونو په اړه کوم سمدستي غبرګون نه دی ښودلی.
عراقچي ويلي، هغه بريدونه چې په داسې حال کې ترسره شول چې ايران د واشنګټن له لوري د وړاندي شويو خبرو اترو د ارزونې لېوالتيا ښودلې وه، دا په ډاګه کوي چې د دې کړکېچ لپاره پوځي حل لاره نه شته.
چين، چې تر ډېره بېطرفه دريځ ساتي، هغه اقدامات رد کړي چې د ايران د حاکميت سرغړونه يې بللې او د تاوتريخوالي د کمولو لپاره يې د ډيپلوماټيکو هڅو ملاتړ کړی دی.
بېجينګ څو ځله له واشنګټن او تهران دواړو غوښتي چې اوربند ته درناوی وکړي او هغه محدوديتونه لرې کړي چې د هرمز تنګي له لارې پر تګ راتګ اغېز کوي.
په ورته وخت کې تسنيم خبري اژانس راپور ورکړی چې عراقچي بېجينګ ته رسېدلی او ټاکل شوې له خپل چينايي سيال سره د دوه اړخيزو اړيکو تر څنګ د سيمهييزو او نړيوالو پرمختګونو په اړه خبرې وکړي.
