سياېناېن راپور ورکړی چې د امریکا ولسمشر ډونالډ ټرمپ او د هغه د کابینې غړي د سپینې ماڼۍ د خبریالانو د کلنۍ مېلمستیا پر مهال د ډزو له یوې پېښې وروسته خوندي دي.
ټرمپ له پېښې وروسته په یوه خبري غونډه کې وویل، یو شکمن کس چې “له څو وسلو سره سمبال و”، د امنیتي پوستې پر لور ورمنډه کړه او وروسته ډزې پیل شوې. د هغه په وینا، یاد کس د امریکا د پټو خدماتو (Secret Service) د ځواکونو له خوا “له منځه یوړل شو”.
د پېښې پر مهال ټرمپ له سټېج څخه ژر وایستل شو، او چارواکو تایید کړه چې د کابینې ټول غړي روغ پاتې دي.
د عدلیې سرپرست وزیر ټوډ بلانش وویل، شکمن کس نیول شوی او ډېر ژر به ورباندې تورونه ولګول شي.
د قانون پلي کوونکو ادارو دغه کس د کالیفورنیا ایالت یو ۳۱ کلن اوسېدونکی بللی دی.
د راپور له مخې، د سياېناېن تجربهکار خبریال ولف بلیتزر د واشنګټن هېلټن هوټل د اصلي تالار څخه بهر ولاړ و، چې یو وسلوال یې له نږدې واټن څخه د ډزو شاهد و.
ویل کېږي چې لسګونه ګډونوال د ځان د خوندي کولو لپاره پټ شول، او امنیتي ځواکونو په چټکۍ سره غبرګون وښود.
سرچینو زیاته کړې چې د پټو خدماتو یو کارکوونکی، چې محافظتي واسکټ یې اغوستی و، د ډزو له امله ټپي شوی او روغتون ته لېږدول شوی دی.
د شکمن کس او د هغه د احتمالي انګېزو په اړه نور جزیات لا نه دي خپاره شوي.
