کابلټریبیون (کېټي) — د یمن د حوثیانو پر ضد د سعودي عربستان په مشرۍ د ائتلاف په وینا، د سعودي عربستان په نجران سیمه کې د یوې کشفي چورلکې د لوېدو له امله دوه پوځي افسران وژل شوي دي.
د ایتلاف ویاند، ترکي المالکي، په یوه خبرپاڼه کې ویلي چې د سعودي عربستان
د ملي ګارد وزارت اړوند د «AH-6i» ډوله کشفي
چورلکه د تخنیکي ستونزې له امله لوېدلې ده.
د المالکي د څرګندونو له مخې، په پېښه کې دوه پوځي افسران مړه شوي دي. په ورکړل شوي متن کې د پېښې د وخت او د چورلکې د لوېدو د څرنګوالي په اړه
نور جزئیات نه دي بیان شوي.
په وروستیو اوونیو کې د سعودي او یمن په جګړه
کې د پام وړ زیاتوالی راغلی دی. د راپورونو له مخې، د سعودي په ملاتړ یمني ځواکونو
د بابالمندب تنګي ته څېرمه د حوثیانو پر ضد عملیات پراخ کړي، په داسې حال کې چې حوثیانو
هم د سعودي پر هوايي ډګرونو، پوځي ځایونو او د تېلو پر تاسیساتو د توغندیو او بېپیلوټه
الوتکو د بریدونو ادعاوې کړې دي.
