په خبرپاڼه کې راغلي چې د هرات والي د بزګرو له هڅو مننه کړې او خبرداری یې ورکړی چې اقلیمي بدلون د هېواد د کرنې لپاره جدي ګواښ دی او بزګرو ته یې سپارښتنه کړې چې خپل کر باید له نوي اقلیمي شرایطو سره برابر کړي.
هغه همدارنګه د ځمکنیو اوبو بېځایه کارول اندېښمنوونکي بللي او له اړوندو ادارو یې غوښتي چې د نویو اوبولګولو لارو، لکه څاڅکي اوبولګول او د جذبي څاګانو جوړول، بزګرو ته زده کړي.
هرات کې د طالبانو د کرنې ریاست مسوولانو ویلي چې په دغه ولایت کې د زعفرانو د کر ساحه ۱۰،۵۰۰ هکتارو ته رسېدلې او سږکال د زعفرانو تولید له ۴۰ ټنو اوښتی دی.
هغوی ټینګار کړی چې هرات د افغانستان شاوخوا ۹۰ سلنه زعفران تولیدوي او له ۴۰ زرو زیات کسان په دې برخه کې بوخت دي.
د طالبانو د کرنې وزارت ویلي چې د افغانستان زعفران، په ځانګړې توګه د هرات زعفران، اوس په نړۍوالو معیارونو کې د غوره محصولاتو په ډله کې دی او په نړۍوالو بازارونو کې یې ځانګړی ځای موندلی دی.
