16 جوزا 1405 - 12:43
محسن نقوی، وزیر داخله پاکستان، در دیدار با رمضان رحیم‌زاده، همتای تاجیکستانی خود، گفته که وجود «اردوگاه‌های تروریستی» در افغانستان نگرانی‌های جدی امنیتی برای کشورهای منطقه ایجاد کرده است.
این دیدار در حاشیه نشست وزیران داخله و امنیت عمومی کشورهای عضو سازمان همکاری شانگهای در شهر بیشکک، پایتخت قرغیزستان، برگزار شده است.
رسانه‌های پاکستانی گزارش داده‌اند که دو طرف در این دیدار درباره چالش‌های امنیتی ناشی از افغانستان، از جمله فعالیت گروه‌های تروریستی و تولید مواد مخدر، گفت‌وگو کرده‌اند.
براساس این گزارش‌ها، مقام‌های پاکستان و تاجیکستان همچنین مدعی شده‌اند که در حال حاضر حدود ۲۵ سازمان «هراس‌افکن» در افغانستان فعالیت دارند.
این در حالی است که حکومت طالبان بارها حضور و فعالیت گروه‌های هراس‌افکن در افغانستان را رد کرده و تأکید کرده است که به هیچ فرد یا گروهی اجازه داده نخواهد شد از خاک افغانستان علیه کشورهای دیگر استفاده کند.
